Maharashtra News LIVE : जळगावात मध्यरात्री मुसळधार पावसाची हजेरी, वातावरणात गारवा
Maharashtra News LIVE : नाशिक विधान परिषद निवडणुकीसाठी आज होणाऱ्या मतमोजणीकडे निकालाकडे सर्वांचं लक्ष लागलं आहे. तर पावसाच्या प्रतीक्षेत असलेल्या मुंबईकरांना अखेर दिलसा मिळाला आहे. मुंबईत अनेक ठिकाणी पाऊस पडला आहे... यासह राज्यातील इतर महत्त्वाच्या घडामोडी आणि अपडेट इथं वाचा.
LIVE NEWS & UPDATES
-
वसई-विरार शहरात मेघगर्जनेसह जोरदार पावसाला सुरुवा
सकाळपासूनच अधूनमधून पाऊस पडत असल्याने वातावरणात गारवा निर्माण झाला असून संपूर्ण परिसर ढगाळ वातावरणाने व्यापला आहे. पालघर जिल्ह्यासाठी आज यलो अलर्ट जारी करण्यात आला असून त्याच पार्श्वभूमीवर सकाळपासूनच पावसाने हजेरी लावण्यास सुरुवात केली आहे. रिमझिम पडत असलेल्या वातावरणामुळे शेतकरी वर्गात आनंदाचे वातावरण निर्माण झाले आहे. तर खरीप हंगामाच्या तयारीला वेग येण्याची अपेक्षा व्यक्त केली जात आहे.
-
खेड तालुक्यातील पिंपरी खुर्दमध्ये विद्युत रोहित्र चोरी, गावचा पाणीपुरवठा ठप्प
पुणे जिल्ह्यातील खेड तालुक्यातील पिंपरी खुर्द गावात विद्युत रोहित्र (डीपी) चोरी झाल्याने संपूर्ण गावाचा पाणीपुरवठा ठप्प झाला आहे. चोरट्यांनी रोहित्रातील ऑईल आणि तारा लांबविल्यामुळे जलजीवन मिशनच्या पाणीपुरवठा योजनेवर परिणाम झाला असून ग्रामस्थांसमोर पिण्याच्या पाण्याचा गंभीर प्रश्न निर्माण झाला आहे. आठवडाभरात दुसऱ्यांदा झालेल्या चोरीच्या घटनेमुळे ग्रामस्थांमध्ये संतापाचे वातावरण असून चोरट्यांचा तातडीने बंदोबस्त करण्याची मागणी जोर धरत आहे. दरम्यान, पाणीपुरवठा पूर्ववत करण्यासाठी महावितरणने तात्काळ नवीन रोहित्र बसवावे, अशी मागणी ग्रामस्थांनी केली आहे.
-
-
कल्याण नगर महामार्गावर भीषण अपघात; ट्रकची दुचाकीला जोरदार धडक
कल्याण नगर महामार्गावर भीषण अपघात झाला आहे. ट्रकने दुचाकीला जोरदार धडक दिली आहे. अपघाताचा थरार सीसीटीव्ही कॅमेरात कैद झाला असून अपघातात बाप लेकीचा जागीच मृत्यू झाला आहे. मृतांमध्ये एक पुरुष, पाच वर्षीय चिमुकलीचा समावेश आहे. दोन मुले आणि एक महिला गंभीर जखमी असून जखमींवर खासगी रुग्णालयात उपचार सुरू आहे.
-
जळगाव विधान परिषद निवडणुकीसाठी आज मतमोजणीची प्रक्रिया पार पडणार
जळगावातील जिल्हाधिकारी कार्यालयातील अल्पबचत भवन येथे मतमोजणीसाठी प्रशासन सज्ज झालं आहे. पोलिसांचा मोठा बंदोबस्त या ठिकाणी मतमोजणीच्या आवारात तैनात करण्यात आला आहे. शिवसेना शिंदे गटाकडून बंडखोरी तसेच मतदानाच्या पूर्वसंध्येला अपक्ष उमेदवाराचे माघार यामुळे जळगावच्या निवडणुकीत राज्यात चर्चेचा विषय बनली होती. महायुतीचे भाजपचे उमेदवार नंदकिशोर महाजन व महाविकास आघाडीचे ठाकरे गटाचे शरद तायडे यांच्यात थेट लढत पार पडली. उमेदवारांच्या भाग्याचा फैसला आज होणार असून निकालाकडे जिल्ह्याचे लक्ष लागला आहे.
-
सांगली-सातारा विधान परिषदे निवडणुकीत भाजपचे पारडे जड
सांगली सातारा विधान परिषदेच्या निवडणुकीची मतमोजणी आज पार पडणार आहे.सांगली येथील तरुण भारत क्रीडांगण येथे मतमोजणी होणार आहे. सकाळी आठ वाजल्यापासून मतमोजणीची प्रक्रिया सुरू होणार असून ही निवडणूक दुरंगी झाल्याचे चित्र स्पष्ट झालेले आहे. महायुती भाजपकडून धैर्यशील कदम तर महाआघाडीकडून अभयसिंह जगताप या दोघांमध्ये लढत खऱ्या अर्थाने झाली आहे. 99.89% इतके मतदान झाले असून सांगली खानापूर विटा तालुक्यातील एका मतदाराने गैरहजेरी लावले होते. त्यामुळे 895 पैकी 894 इतके मतदान झाले आहे. सकाळी आठ वाजल्या पासून मतमोजणी सुरु होणार असून जय आणि पराजय कोणाचा हे 11 वाजे पर्यंत चित्र स्पष्ट होईल. यंदाच्या निवडणुकीमध्ये महायुतीचे उमेदवार धैर्यशील कदम यांना अवघड वाटणारे निवडणूक शेवटच्या टप्प्यात महायुतीने एक दिलाने लढल्याने थोडीशी सोपी झाल्याचे दिसून आले आहे.पण अंडर करंट असू शकतो अशीही चर्चा मतदारांमध्ये होती.या निवडणुकीमध्ये प्रचार सभा नसून गुप्त बैठका व सेटिंग यावर दोन्ही गटाकडून जोर लावण्यात आला होता आज या विधान परिषदेचा आमदार कोण होणार ते चित्र स्पष्ट होणार आहे
-
-
धाराशिव बीड लातूर विधान परिषद निवडणुकीचा आज निकाल
विधान परिषदेच्या उस्मानाबाद- लातूर-बीड स्थानिक प्राधिकारी मतदारसंघाच्या निवडणुकीची मतमोजणी आज पार पडत आहे सकाळी ८ वाजता सुरू होणार आहे.ही मतमोजणी भाई उद्धवराव पाटील शासकीय औद्योगिक प्रशिक्षण संस्था (आयटीआय) धाराशिव येथे होणार असून प्रशासनाने आवश्यक सर्व तयारी पूर्ण केली आहे. या पार्श्वभूमीवर मोठा पोलीस बंदोबस्त ठेवण्यात आला आहे महायुतीचे उमेदवार बसवराज पाटील तर महाविकास आघाडीचे उमेदवार महेश देशमुख यांच्यामध्ये झाली होती लढत थोड्याच वेळात निकाल हाती येणार
-
शिरूर तालुक्यातील गंभीर गुन्ह्यांतील सराईत गुन्हेगार एमपीडीए अंतर्गत स्थानबद्ध
शिक्रापूर पोलीस ठाणे हद्दीतील औद्योगिकीकरण वाढत असताना गुन्हेगारीला आळा घालण्यासाठी पुणे ग्रामीण पोलिसांनी मोठी कारवाई केली आहे. खुनाचा प्रयत्न, खंडणी, अग्निशस्त्रासह हल्ला असे गंभीर गुन्हे करणाऱ्या सराईत गुन्हेगाराला महाराष्ट्र धोकादायक व्यक्ती प्रतिबंधक कायदा MPDDA अंतर्गत स्थानबद्ध करून नागपूर मध्यवर्ती कारागृहात पाठवले आहे. गणेश भाऊसाहेब फडतरे, वय 35, रा. फडतरेवस्ती, कोरेगाव भीमा, ता. शिरूर, जि. पुणे असे स्थानबद्ध करण्यात आलेल्या इसमाचे नाव आहे.
-
-
मुंबई-उपनगरात मान्सूनची हजेरी, कांदिवली ते गोरेगाव पावसाची बॅटिंग
मुंबईकरांची प्रतीक्षा संपली. अखेर मान्सूनने मुंबईसह उपनगरात हजेरी लावली आहे. कांदिवली, मालाड, बोरिवली, गोरेगावसह सर्वच भागांत पावसाला सुरुवात झाली आहे. गेल्या 15 मिनिटांपासून मुंबईच्या उपनगरात पाऊस सुरू आहे. कांदिवली, मालाड, बोरिवली, गोरेगाव परिसरात पाऊस सुरू आहेत. मान्सूनच्या आगमनाने मुंबईकरांना उकाड्यापासून दिलासा मिळाला आहे.
-
विधान परिषद निवडणुकीच्या मतमोजणी पूर्वीच भाजपाचे उमेदवार प्रवीण पोटे यांच्या विजयाच्या अभिनंदनाचे लागले बॅनर
अमरावतीत विधान परिषद निवडणुकीच्या मतमोजणी पूर्वीच भाजपाचे उमेदवार प्रवीण पोटे यांच्या विजयाच्या अभिनंदनाचे बॅनर लागले आहेत. अमरावतीच्या गर्ल्स हायस्कूल चौकात प्रवीण पोटे यांच्या समर्थकांनी विजयाचे बॅनर लावले. जिल्ह्याचे विकास पुरुष विधान परिषदमध्ये भरघोस मतांनी निवडून आल्याबद्दल प्रवीण पोटे पाटील यांचे अभिनंदन असा उल्लेख बॅनरवर केला आहे.
-
दादरमध्ये पावसाची दमदार हजेरी; उकाड्यापासून नागरिकांना दिलासा
मुंबईत आज सकाळपासूनच हवामानात अचानक बदल झाला असून, दादर आणि आसपासच्या परिसरात ढगाळ वातावरणात पावसाला सुरुवात झाली आहे. या पहिल्यावहिल्या दमदार सरींमुळे वातावरणात छान गारवा निर्माण झाला आहे. गेल्या काही दिवसांपासून प्रचंड उकाड्याने हैराण झालेल्या सामान्य नागरिकांना यामुळे मोठा दिलासा मिळाला आहे.
Maharashtra News LIVE : जळगावात मध्यरात्री मुसळधार पावसाने हजेरी लावली. तब्बल एक ते दीड तासापर्यंत वादळी वाऱ्यासह मुसळधार पाऊस झाल्यने वातावरणात काही प्रमाणात गारवा निर्माण झाला आहे. उकाड्यामुळे त्रस्त असलेल्या नागरिकांना पावसामुळे दिलासा मिळाला आहे. तर मुंबईकरांची प्रतीक्षा देखील अखेर संपली आहे. अखेर मान्सूनने मुंबईसह उपनगरात हजेरी लावली आहे. कांदिवली, मालाड, बोरिवली, गोरेगावसह सर्वच भागांत पावसाला सुरुवात झाली आहे. तर आजची सर्वात महत्त्वाची घडामोड म्हणजे, नाशिक विधान परिषद निवडणुकीसाठी आज होणाऱ्या मतमोजणीकडे निकालाकडे सर्वांचं लक्ष लागलं आहे. सकाळी 8 वाजता प्रत्यक्ष मतमोजणीला सुरुवात होणार आहे. जिल्हाधिकारी कार्यालयातील रेकॉर्ड रूम हॉलमध्ये मतमोजणी होणार आहे. यासाठी एकूण 40 अधिकारी-कर्मचाऱ्यांची नियुक्ती करण्यात आली आहे. मतमोजणीसाठी चार टेबलची व्यवस्था करण्यात आली आहे. यासह राज्यातील इतर महत्त्वाच्या घडामोडी आणि अपडेट इथं वाचा.
Published On - Jun 22,2026 8:03 AM
