महायुतीत घडामोडींना वेग, मुख्यमंत्र्यांनी बोलावली तातडीची बैठक, खोतकर सुनेत्रा पवारांच्या भेटीला? मुलाला तिकीट मिळणार?

Arjun Khotkar Meet Sunetra Pawar: स्थानिक स्वराज्य संस्थांच्या विधान परिषद निवडणुकीवरून महायुतीतील वाद चव्हाट्यावर आले आहेत. जळगाव जागेनंतर इतर ठिकाणही अशीच वादाची ठिणगी पडण्याची शक्यता आहे. शिंदे सेनेचे नेते अर्जुनराव खोतकर यांनी आज सकाळी उपमुख्यमंत्री सुनेत्रा पवार यांची भेट घेतली. मुलगा अभिमन्यू खोतकर याला तिकीट मिळण्यासाठी ते आग्रही आहेत. तर दुसरीकडे मुख्यमंत्री देवेंद्र फडणवीस यांनी तातडीने महायुतीची बैठक बोलावली आहे. मुंबईत आज दिवसभर जोरदार राजकीय हालचाली होण्याची शक्यता आहे.

विधान परिषद निवडणुकीचा महायुतीतील तिढा आज सुटणार?

मुख्यमंत्री देवेंद्र फडणवीस यांनी आज महायुतीची बैठक बोलावली आहे. आज सायंकाळी वर्षा निवासस्थानी बैठक होणार आहे. उपमुख्यमंत्री एकनाथ शिंदे व सुनेत्रा पवार, भाजप प्रदेशाध्यक्ष रवींद्र चव्हाण व राष्ट्रवादीचे प्रदेशाध्यक्ष सुनील तटकरे तसेच मंत्री उदय सामंत हे या बैठकीला उपस्थित असतील. पुण्यावरून भाजप-राष्ट्रवादी, तर नाशिक आणि छत्रफती संभाजीनगर वरून शिवसेना-भाजपमध्ये धुसफूस सुरू आहे. आजच्या बठकीत महायुतीतील जागा वाटपाचा तिढा सुटण्याची शक्यता आहे.

खोतकर हे मुलासाठी आग्रही

शिंदेच्या शिवसेनेचे आमदार अर्जुन खोतकर हे उपमुख्यमंत्री सुनेत्रा पवार यांची देवगिरी बंगल्यावर आज सकाळी भेट घेतली. खोतकर हे मुलगी दर्शना खोतकर-झोलसाठी आग्रही असल्याचे बोलले जात होते. पण खोतकर यांनी सुनेत्रा पवार यांची भेट घेतल्यानंतर मुलगी नाही तर मुलगा अभिमन्यू खोतकर विधान परिषदेसाठी इच्छुक असल्याची माहिती दिली. अभिमन्यू याला तिकीट देण्याचा प्रश्न हा पक्षाचा आहे. याविषयी उपमुख्यमंत्री एकनाथ शिंदे हे निर्णय घेतील असे खोतकर म्हणाले. अभिमन्यू खोतकर याला तिकीट मिळावे अशी मागणी केल्याची माहिती त्यांनी दिली. तर सुनेत्रा पवार यांच्याकडे मुलाच्या उमेदवारीला पाठिंबा देण्याची कुठलीही मागणी केली नाही. मी कामासाठी त्यांना भेटल्याची माहिती खोतकर यांनी दिली. त्यामुळे छत्रपती संभाजीनगर नंतर मराठवाड्यातील अजून एका जागेसाठी शिंदे सेना आग्रही असल्याचे दिसते. आजच्या बैठकीत जागा वाटपावर शिक्कामोर्तब होणार का याकडे सर्वांचे लक्ष लागले आहे.