Sangli ACB Action : सांगलीत लाच घेणे पोलिसाला भोवले, सहाय्यक पोलीस उपनिरीक्षकाला एसीबीकडून अटक

सांगली : एक हजार रुपयांची लाच (Bribe) घेताना एका सहाय्यक पोलीस उपनिरीक्षका (Assistant Sub-Inspector of Police)स लाचलुचपत प्रतिबंधक विभागाने अटक (Arrest) केली आहे. एका रिक्षाचालकावर कारवाई न करण्यासाठी या पोलिसाने एक हजार रुपयांची लाच मागितली होती. रवीशंकर रामचंद्र चव्‍हाण (53) असे या पोलिसाचे नाव आहे. मिरजेच्या महात्मा गांधी चौकी पोलीस ठाण्यात चव्हाण कार्यरत आहे. एक हजार रुपयाची लाच स्विकारताना चव्हाण यांना लाचलुचपत प्रतिबंधक विभागाकडून रंगेहाथ अटक करण्यात आली आहे. सहाय्यक पोलीस उपनिरीक्षकवर झालेल्या कारवाईमुळे सांगली पोलीस दलात खळबळ माजली आहे.

पोलीस ठाण्याबाहेर सापळा रचून रंगेहाथ पकडले

एका वडाप रिक्षा चालककाकडे कारवाई न करण्यासाठी रवी चव्हाण यांनी एक हजार रुपये लाचेची मागणी 10 जून रोजी केली होती. त्यानंतर संबंधित रिक्षाचालकाने लाचलुचपत विभागाकडे याबाबतची तक्रार नोंदवली होती. त्याची पडताळणी केल्यानंतर 15 जून रोजी महात्मा गांधी चौक पोलीस ठाण्याच्या बाहेर सापळा रचून रिक्षाचालकाकडून एक हजार रुपयांची लाच स्वीकारताना लाचलुचपत प्रतिबंधक विभागाच्या पथकाने चव्‍हाण यांना रंगेहाथ पकडले. याप्रकरणी महात्मा गांधी चौक पोलीस ठाण्यामध्येच रवीशंकर चव्हाण यांच्या विरोधात गुन्हा दाखल करण्यात आल्याची माहिती सांगलीचे लाचलुचपत प्रतिबंधक विभागाचे उपअधीक्षक सुजय घाटगे यांनी दिली.

इंदापूरमध्ये भूमी अभिलेख कर्मचाऱ्याला लाच स्वीकारताना रंगेहाथ पकडले

मोजणीनंतर हद्द कायम करण्यासाठी 25 हजार रुपयांच्या लाचेची मागणी करुन 20 हजार रुपये घेताना इंदापूर येथील भूमी अभिलेख विभागाच्या कर्मचाऱ्याला पुण्याच्या लाचलुचपत प्रतिबंधक खात्याच्या पथकाने रंगेहाथ पकडले. राजाराम दत्तात्रय शिंदे असे आरोपीचे नाव आहे. पुण्याच्या लाचलुचपत प्रतिबंधक विभागाचे पोलिस निरीक्षक संदिप वऱ्हाडे आणि त्यांच्या पथकाने ही कारवाई केली. या संदर्भात इंदापूर पोलीस ठाण्यात गुन्हा दाखल झाला आहे. (ACB arrests Assistant Sub-Inspector of Police for taking bribe of one thousand)