Uddhav Thackeray: मुख्यमंत्री विमानात भेटले, हतबल आणि आत्मविश्वास गमावलेले… गडकरींप्रमाणेच फडणवीसांचे पंतप्रधानपदाचे पंख… उद्धव ठाकरे यांचा मोठा दावा

Uddhav Thackeray on Devendra Fadnavis: उद्धव ठाकरे दोन दिवसांपासून विदर्भ आणि मराठवाड्याच्या दौऱ्यावर आहेत. फुटीर खासदारांच्या मतदारसंघात कार्यकर्त्यांशी संवाद साधत पक्ष संघटना मजबूत करण्यावर त्यांनी भर दिला आहे. खासदारांचा समाचार घेतानाच त्यांनी भाजपवरही जोरदार निशाणा साधला आहे. काल परवा नागपूरपर्यंत त्यांनी मुख्यमंत्री देवेंद्र फडणवीस यांच्यासोबत विमान प्रवास केला. त्यावरून राजकारणात चर्चा झडत असतानाच त्यांनी मोठे भाष्य केले आहे. मुख्यमंत्री देवेंद्र फडणवीस यांचे भाजपच्या ज्येष्ठांनी खच्चीकरण सुरू केल्याचा दावा त्यांनी केल्याने एकच खळबळ उडाली आहे.

पंतप्रधान पदाच्या शर्यतीमधील चेहरे बाद

मध्यप्रदेशात भाजपने शिवराज सिंह चौहानाच्या नावाने निवडणुका जिंकल्या. मामा म्हणायचे. बनवलं ना मामा. उद्या हा मामा पंतप्रधान पदाच्या शर्यतीत येऊ शकतो. भाजपचा अध्यक्ष बनू शकतो. मामा को उपर बुलाओ. मामा को उल्लू बनाओ. डाल दिया कोने में. आता शिवराजचं नावच नाही कुठे. जो जो पंतप्रधान पदाच्या शर्यतीत येतो त्यांना वेळेवर बाजूला करतात. तसंच देवेंद्र फडणवीस यांचे पखं कापण्याचे प्रयत्न सुरू आहेत. कालपरवा ते माझ्यासोबत विमानात बसले होते. पण हतबल होते. कळतच नव्हतं हे मुख्यमंत्री आहे. असा काय झाला हा. आत्मविश्वास गमावलेला माणूस. आपले पंख कापतायेत. कापणारे आपलीच माणसे आहेत. हे त्यांना कळतंय. न्याय कुणाकडे मागायचा. कोणतं दार ठोठवायचं. दार उघडलं तर पंख कापणार. ते दार उघडलं तरी पंख कापणार. म्हणजे जे काही वाचले ते वाचून जेवढे दिवस आहेत ते ढकललेले बरे. या परिस्थितीत फडणवीस आहे, असा मोठा दावा उद्धव ठाकरे यांनी परभणीतील सभेत केला आहे.

कदाचित उद्या फडणवीस पंतप्रधान पदाच्या शर्यतीत आले तर. नितीन गडकरी होते की नाही. अध्यक्ष होते. पुन्हा अध्यक्ष झाले असते तर पंतप्रधान झाले असते. म्हणून गडकरींचे पंख असे कापले असे कापले की त्यांच्या निष्ठेत इथेनॉलचे पाणीच घालून टाकले. भेसळ करून टाकली. आता गडकरी काय करू शकतात. उड उड उड… कसे उडणार. पंख त्यांनी छाटले, असा दावा उद्धव ठाकरे यांनी केला.

वापर करून फेकून द्या

मिंधेंना भविष्य नाही. गद्दार हा गद्दार असतो. वापरा आणि फेकून दिलं जातं, असा इशारा त्यांनी फुटीर खासदारांना दिला. हा गद्दार परभणीत यायला तोंड दाखवायला शिल्लक आहे. माणसं संपवून टाकलं जात आहे. उद्या मिंध्याचा तसाच कार्यक्रम होणार आहे. डोक्यावर घेतील आणि सोडून देतील. विसर्जन करतील. गद्दार भाजपमध्ये घेतले नाही. तृणमूलचे इतर पक्षात घेतले. भाजपमध्ये घेतले असते तर पक्षाचा आदेश लागू होईल. त्यामुळे इतर पक्षात घेतले. पंतप्रधान पदाचा मार्ग मोकळा केला. म्हणजे अंतर्गत वाद त्यांच्यात आहे. आपल्यात नाही, हे सांगायला ठाकरे विसरले नाहीत.

मला परभणीचे सर्व आमदार निवडून पाहिजे. परभणी हा भगवा करून पाहिजे. अस्सल भगवा पाहिजे. त्यावर कोणतंही चिन्ह नको. निशाणीचे झेंडे वेगळे लावा. भगव्यात गोंधळ उडवून देण्याचा त्यांचा डाव आहे. त्यामुळे भगव्यावर कोणतेही चिन्ह नको. मशाली या झेंड्या पुरत्या नकोत. या गद्दारांविरोधातील मशाली धगधगत्या ठेवल्या पाहिजे, असे आवाहन उद्धव ठाकरे यांनी कार्यकर्त्यांना परभणीच्या सभेतून केले.