हा Video पहाल तर वडापाव खाणं सोडून द्याल..; लोणावळ्यातील किळणवाणा प्रकार

लोणावळ्यातल्या प्रसिद्ध उपहारगृहात उंदरांनी चावलेल्या बटाट्यांचे वडापाव आढळल्याचा व्हिडीओ व्हायरल होत आहे. लोणावळ्यामधील चौधरी वडापावच्या किचनमध्ये स्वच्छतेच्या आणि आरोग्याच्या नियमांचं उल्लंघन होत असल्याचं या व्हिडीओमधून उघड झालं आहे. या दुकानाच्या किचनमध्ये खूप घाण आणि उंदरांचा धुमाकूळ पहायला मिळाला. त्याचप्रमाणे साठवलेली अन्नसामग्री, जेवणासाठी वापरण्यात येणारी भांडी आणि पाणी अत्यंत वाईट अवस्थेत होते. धक्कादायक बाब म्हणजे काही सडलेले आणि उंदरांनी खाल्लेले बटाटे वडापाव बनवण्यासाठी वापरले जात होते.

साफसफाईकडे पूर्णपणे दुर्लक्ष

चौधरी वडापावच्या किचनमध्ये आरोग्याच्या नियमांचं उल्लंघन होत असल्याचं तपासणीत उघड झालं. किचनमध्ये खूप घाण होती. उंदरांनी अक्षरश: धुमाकूळ घातला होता. तसंच, खराब अन्नसामग्री साठवलेली होती. धक्कादायक बाब म्हणजे, काही सडलेले आणि उंदरांनी खाल्लेले बटाटे वडापावमध्ये वापरले जात होते. दुकानात साफसफाईकडे पूर्णपणे दुर्लक्ष केलं गेलं होतं. दुकानात काम करणाऱ्या कर्मचाऱ्यांकडून स्वच्छतेचे कोणतेच नियम पाळले जात नव्हते. स्वयंपाकघरात झुरळं आणि उंदीर फिरत होते.

पहा व्हिडीओ-

हे दुकान लोणावळ्यातील मध्यवर्ती भागात आहे. याच परिसरात अनेक हॉस्पिटल्स आहेत. त्यामुळे रुग्णांचे नातेवाईक, नर्स, डॉक्टर आणि पर्यटक इथं मोठ्या प्रमाणात खाण्यासाठी येतात. अशा ठिकाणी आरोग्याच्या नियमांचं उल्लंघन करणं धोक्याचं आहे. “सडलेले आणि दूषित अन्नपदार्थ खाल्ल्यामुळे विषबाधा, जुलाब, उलटी, पोटदुखी तसंच काही वेळा जीवघेणा संसर्ग होऊ शकतो,” असं डॉक्टरांनी सांगितलं. विशेषतः पर्यटक आणि लहान मुलांसाठी हे खूप धोकादायक आहे. दुकानाच घाणीचं आणि अस्वच्छतेचं साम्राज्य असताना सोशल मीडियावर व्हिडिओ व्हायरल करणाऱ्या तरुणाला चौधरी वडेवाल्यांनी दमदाटी केली. अखेर याप्रकरणी लोणावळा शहर पोलीस ठाण्यात तक्रार दाखल करण्यात आली आहे.

लोणावळ्यात अनेक पर्यटक फिरायला येतात. वडापाव हा अनेकांच्या आवडीचा पदार्थ आहे. त्यामुळे पर्यटनक्षेत्राच्या ठिकाणी असलेल्या या दुकानावर वडापाव खाण्यासाठी अनेकांनी गर्दी व्हायची. परंतु इथला किळसवाणा प्रकार उघडकीस आल्यानंतर नेटकऱ्यांनीही संताप व्यक्त केला आहे. संबंधित दुकानदारावर त्वरित कारवाई व्हावी, अशी मागणी नेटकरी आणि पर्यटक करत आहेत.