सोनाई डेअरीच्या प्रविण माने यांचा पाठिंबा कुणाला?; पत्रकार परिषद घेत म्हणाले…

इंदापूर आणि परिसरात जनाधार असणाऱ्या सोनाई डेअरीच्या प्रविण माने यांचा पाठिंबा कुणाला? याची राजकीय वर्तुळात होत होती. आज पुण्यात पत्रकार परिषद घेत याबाबत स्पष्ट भूमिका मांडली. आपण अजित पवारांसोबत असल्याचं माने यांनी स्पष्टपणे सांगितलं. त्यामुळे बारामती लोकसभा मतदारसंघात सुप्रिया सुळे यांना मोठा धक्का बसला आहे. आजची पत्रकार परिषद बोलवण्याचं कारण म्हणजे बारामती लोकसभा मतदारसंघात धुमसचक्री सुरू आहे. माने कुटुंब नेहमीच पवार कुटुंबासोबत राहिलं आहे. राज्यात अनेक बदल झालेत. अजित पवारांचे हात बळकट करुन त्यांची ताकद वाढवण्यासाठी इंदापूर तालुक्याच्या विकासासाठी उभं राहण्याचा निर्णय घेतला आहे. आम्ही आजित पवारांसोबत आहोत, असं प्रविण माने म्हणाले.

प्रविण माने यांची भूमिका काय?

राज्याच्या विकासासाठी अजित पवार हे भाजपसोबत गेले आहेत. आम्ही त्यांच्या मार्गदर्शनाखाली काम करत आहोत. आता प्रचार सुरू होणार आहे. आजपासून आम्ही प्रचार सुरू करणार आहोत. 8 दिवसापूर्वी लोकसभा मतदारसंघात सुनेत्रा पवार यांची उमेदवारी जाहीर झाली. सुनेत्रा वहिनीचं मोठं सामाजिक काम राहिलेलं आहे. पण वहिनी कधी प्रकाशझोतात आलेल्या नाहीत. आता मात्र त्या राजकारणत आलेल्या आहेत. त्यांना निवडून आणण्यासाठी आम्ही प्रयत्न करू, असं प्रविण माने म्हणाले.

अजित पवारांचं कौतुक

अजित पवार म्हणजे खमके नेते आहेत. ते सकाळी ६ वाजता कामाला सुरुवात करतात. शब्दाला पक्के असे दादा आहेत. बारामतीनंतर इंदापूर तालुक्यात कामं सुरू आहेत. दादा इंदापुरात आले होते. काही व्यापाऱ्यांनी निवेदन दिलं होतं. विकास कामे अजित दादाच करू शकतात. म्हणून आम्ही निर्णय घेतला आहे, की दशरथ माने असतील आणि इतर कुटुंबिय अजितदादांच्या पाठिशी उभं राहणार आहे, असं प्रविण माने म्हणाले.

प्रविण मानेंचा पाठिंबा कुणाला?

आमच्यावर कोणताही दबाव नाही. आम्ही अजून ही पवार कुटुंबासोबत आहोत. अजित पवार हे विकास पुरुष आहेत. त्यामुळे आम्ही अजित पवारांसोबत जाण्याचा निर्णय घेतला आहे. सुप्रियाताईंनी पण या मतदारसंघात काम केलेली आहेत. मात्र जास्त काम ही अजित पवारांनी केली आहेत. आम्ही आतून शरद पवारांना मदत करणार या चर्चेत तथ्य नाही. सुनेत्रा वाहिनीचा आम्ही प्रचार करणार आहोत. दशरथ माने आज नव्हते. पण त्यांनीच मला पत्रकार परिषद घेवून काय बोलायचं हे सांगितलं, असं प्रविण माने म्हणाले.