Video: भयंकर, झोपेत असतानाच साप बारकीच्या अंथरुणात शिरला, दोन तास डोलत राहीला, वर्ध्यात काळजाचा ठोका चुकवणारा प्रसंग
एक एक क्षण पुढं सरकत नव्हता आणि समोरच्या संकटातूनही सुटका होत नव्हती. पूर्वाकडं बघून सगळ्यांनाच वाईट वाटत होतं. आईची अवस्था तर विचारु नका. असेच शेवटी दोन एक तास निघून गेले. गर्दी, त्यांचा थोडासा कलकलाट ह्या सगळ्यातून शेवटी सापानं स्वत:चं प्रस्थान हलवलं
पावसाळा सुरु आहे आणि त्यामुळे ‘इचुकाडा’ काही कमी नाही. त्यातल्या त्यात गावाकडं घराच्या आजूबाजुला गुडघाभर ‘आयचन’ वाढलंय. त्यात मग पुन्हा दोन दोन दिवस पावसाची रिपरिप. कधी कधी मुसळधार. अशा ह्या पाऊसपाण्यामुळे सापासारखी जनावरं सैरभैर झाली नाही तर नवलच. कोरड्या जागेच्या शोधात ह्या सापांनी घरात घुसखोरी केलीय आणि नेमकं तेच आता धोकादायक झाल्याचं दिसतंय. वर्ध्यात जो प्रसंग घडला त्यानं काळजाचं पाणी पाणी झालं. काहींना हार्ट अटॅक येतो की काय अशी अवस्था होती. झोपेत असलेल्या मुलीच्या अंथरुणात साप शिरला आणि तो पाच दहा मिनिटं नाही तर थेट दोन तास फणा काढून डोलत राहीला.
नेमकं काय घडलं? वर्धा तालुक्यात बोरखेडी-कला नावाचं गाव आहे. ह्याच गावात गडकरींचं कुटुंब राहतं. शुक्रवारी रात्री पूर्वा गडकरी नावाची सहा वर्षाची छोटी मुलगी तिच्या आईसोबत झोपी गेली. अर्थातच तिचं अंथरुण जमीनीवर होतं. बाजुलाच एक दुसरा पलंगही टाकलेला होता. पूर्वा खाली गादीवर झोपलीय. फोटोत बघितलं तर जागा तशी ऐसपैस दिसत नाही. आई आणि मुलगी दोघीही झोपी गेल्या. मध्यरात्रीच्या सुमारास म्हणजे बाराच्या आसपास आईला काही चुळबूळ होत असल्याचं लक्षात आलं. काही तरी अंगावर सरपटतंय असं वाटायला लागलं. आई गडबडीनं उठली आणि अंथरुणाच्या बाजूला झाली. जरा दिवा मोठा करुन बघितला तर अंथरुणावर साप होता. तोही भला मोठा. आई स्वत: बाजूला झाली खरी पण सहा वर्षाच्या पूर्वावर संकट कोसळलं. कारण तो साप पूर्वाच्या अर्ध्या अंगाखाली होता आणि आता त्यानं फणा काढला होता. पूर्वालाही जाग आली पण ती स्तब्ध राहीली. बिचारीला काय घडतंय हे फार कळत नसावं पण आपल्या अंगावर साप आहे हे तिला कळतच होतं. तीही घाबरुण गेली. काही वेळातच तिला खरं तर घाम सुटला.
शेवटी तो डसलाच
आईनं आजूबाजूच्या लोकांनाही उठवलं. पूर्वाची सुटका कशी करायची असं मोठं संकट उभं ठाकलं. पूर्वा जशी झोपली होती तशीच आता स्तब्ध होती. तिला तसच राहायला सांगितलं होतं. साप आता जाईल, थोड्या वेळानं जाईल याची सगळे जण वाट बघत राहीले. पण फणा काढलेला साप आता जाग्यावरून थोडाही हलत नव्हता. पूर्वा पुरती भीतीग्रस्त झाली होती. बघता बघता गाव जागं झालं. गडकरींच्या घराबाहेर आणि आत बघ्यांची गर्दी वाढली. मध्यरात्रं उलटून गेली होती. गर्दी वाढल्यामुळे असेल पण सापही भीतीनं आता जागचा हलत नव्हता. पूर्वाला ओढून घ्यावं किंवा तिला तातडीनं बाजूला सरकायला सांगावं तर सापानं फणा काढलेला होता आणि एक चूकही महागात पडली असती. त्यामुळे सगळे जण सापाच्या जाण्याचीच वाट बघत बसले. एक एक क्षण पुढं सरकत नव्हता आणि समोरच्या संकटातूनही सुटका होत नव्हती. पूर्वाकडं बघून सगळ्यांनाच वाईट वाटत होतं. आईची अवस्था तर विचारु नका. असेच शेवटी दोन एक तास निघून गेले. गर्दी, त्यांचा थोडासा कलकलाट ह्या सगळ्यातून शेवटी सापानं स्वत:चं प्रस्थान हलवलं. पण जाताना तो डसलाच. पूर्वाच्या हाताला त्यानं चावा घेतला. नंतर पूर्वाला सेवाग्रामच्या अतिदक्षता विभागात दाखल करण्यात आलं. तिथं तिच्यावर उपचार सुरु आहेत. एवढ्या गर्दीतही साप पोबारा करण्यात यशस्वी झाला.
VIDEO : Mumbai Sakinaka Case | सरकारचा धाक नसल्यामुळं अश्या घटना घडतायत -प्रविन दरेकर
