लोकल प्रवासात त्याचा मृत्यू झाला, ओळख कशी पटवायची हा मोठा प्रश्न पोलिसांसमोर होता, पण एका…
सीएसएमटी टर्मिनस ते कर्जत लोकलमध्ये एका व्यक्तीचा आकस्मात मृत्यू झाला. पण ओळख पटवण्यासाठी एकही वस्तू इसमाकडे नव्हती. यामुळे त्याची ओळख कशी पटवायची हा मोठा प्रश्न पोलिसांसमोर होता.
सुनील जाधव, डोंबिवली : घातपात, आकस्मात मृत्यूच्या घटना रोजच घडत असतात. पोलिसांसमोर प्रत्येक घटनेचा उलगडा करत पीडित आणि आरोपींची ओळख पटवण्याचे आव्हान असते. असेच एक आव्हान डोंबिवली लोहमार्ग पोलिसांसमोर होते. छत्रपती शिवाजी महाराज टर्मिनसहून कर्जतला जाणाऱ्या लोकलमध्ये ठाणे ते डोंबिवली दरम्यान एका इसमाला अचानक अस्वस्थ वाटू लागले. उपचारासाठी नेण्याआधीच इसमाचा लोकलमध्येच मृत्यू झाला. यानंतर इसमाचा मृतदेह डोंबिवली लोहमार्ग पोलिसांनी ताब्यात घेत पालिका रुग्णालयात पाठवला. मात्र सदर इसमाजवळ ओळख पटवणारी एकही गोष्ट नव्हती. यामुळे इसमाची ओळख कशी पटवायची हा मोठा प्रश्न पोलिसांसमोर होता. पण म्हणतात कानून के हाथ लंबे होते है. तसंच काहीसं झालं. पोलिसांची नजर इसमाच्या शर्टवर वस्तूवर पडली अन् अखेर मयत व्यक्तीच्या कुटुंबीयांचा शोध लागला.
मेहबूब नासिर शेख असे मयत व्यक्तीचे नाव आहे. मेहबूबच्या मृत्यूनंतर लोकलमधील प्रवाशांनी डोंबिवली लोहमार्ग पोलिसांना याची माहिती दिली. पोलिसांनी मृतदेह ताब्यात घेत पालिकेच्या रुक्मिणीबाई रुग्णालयात शवविच्छेदनासाठी पाठवला. मेहबूबकडे ओळख पटवण्यासाठी एकही खूण नव्हती. यामुळे पोलिसांसमोर त्याची ओळख कशी पटवायची हा प्रश्न होता.
‘असा’ लागला शोध
मयताची ओळख कशी पटवायची या विचारात असतानाच पोलिसांची पारखी नजर मेहबूबच्या शर्टवर पडली. शर्टवर फॅशन टेलर, वांगणी वेस्ट असा टॅग पोलिसांना दिसला आणि पोलिसांना आशेचा किरण दिसला. पोलिसांनी हा व्यक्ती वांगणी परिसरातील असावा, अंदाज लावून वांगणीमध्ये फॅशन टेलरचा शोध घेण्यास सुरवात केली. अखेर पोलिसांना फॅशन टेलर सापडला. पोलिसांनी त्याला मयत इसमाचा फोटो दाखवला असता तो त्याने ओळख पटवली. सदर इसमाचे नाव मेहबूब शेख असे असून, तो वांगणीमध्ये लक्ष्मी सोसायटीत राहत असल्याचे पोलिसांना कळले.
यानंतर पोलिसांनी टेलरला सोबत घेऊन मेहबूबचे घर गाठले. पोलिसांनी कुटुंबीयांना रुक्मिणीबाई रुग्णालयात येऊन मयताची ओळख पटवण्यास सांगितले. यानंतर कुटुंबीयांनी रुग्णालयात येऊन ओळख पटवल्यानंतर मृतदेह कायदेशीर प्रक्रिया पूर्ण करुन त्यांच्या ताब्यात देण्यात आला. वरिष्ठ निरीक्षक अर्चना दुसाने आणि पोलीस निरीक्षक किरण उंदरे यांच्या मार्गदर्शनाखाली हवालदार पी. के. पिंगळे आणि के. टी. पाटील यांनी तपासात महत्वाची भूमिका बजावली.
