Ganesh Utsav : सार्वजनिक गणेशोत्सवाच्या परवानगीसाठी महापालिकेची एक खिडकी सुविधा

ठाणे : ठाणे महानगरपालिका हद्दीत गणेशोत्सवा (Ganeshotsav)साठी तात्पुरत्या स्वरुपात एक खिडकी योजना (One window Scheme) सुरु केली आहे. सार्वजनिक ठिकाणी मंडप, स्टेज उभारण्यासाठी आता मंडळांना ऑनलाईन अर्ज उपलब्ध करण्यासोबतच मंडळांना संबंधित प्रभाग समिती क्षेत्रातील नागरी सुविधा केंद्र येथील एक खिडकी योजनेद्वारे देखील अर्ज (Application) सादर करता येणार आहेत. या दोन्ही पध्दतीने सादर केलेल्या अर्जांची छाननी केल्यावर संबंधित प्रभाग समितीकडून परवानगी प्रदान करण्यात येणार असल्याची माहिती महापालिका आयुक्त डॉ. विपिन शर्मा यांनी आज दिली. तसेच ठाणेकरांनी यंदाचा गणेशोत्सव पर्यावरणपूरक, सामाजिक प्रबोधनात्मक कार्यक्रम राबवून उत्साहात साजरा करावा, असे आवाहन महापालिका आयुक्त डॉ. विपिन शर्मा यांनी केले आहे.

शासनाने 2022 च्या गणेशोत्सवासाठी मंडप परवानगी शुल्क माफ करण्याचा निर्णय घेतलेला आहे. त्यानुसार ठाणे महानगरपालिकेने सार्वजनिक गणेशोत्सव मंडळांकडून मंडप परवानगी शुल्क व अनामत रक्कम न घेण्याबाबत निर्णय घेतल्याचे डॉ. शर्मा यांनी सांगितले.

एक खिडकी योजना काय आहे ?

ठाणे महानगरपालिकेच्या वतीने गणेशोत्सवासाठी तात्पुरत्या स्वरुपात सार्वजनिक ठिकाणी मंडप, स्टेज उभारण्यासाठी मंडळांना ऑनलाईन अर्ज सुविधा उपलब्ध करून देण्यात आली आहे. तसेच प्रभाग समिती क्षेत्रातील नागरी सुविधा केंद्र येथील एक खिडकी योजनेद्वारे देखील अर्ज सादर करता येतील. यामध्ये वाहतूक पोलीस व पोलीस प्रशासन यांच्या प्रतिनिधी संबंधित सादर केलेल्या अर्जांची छाननी करतील व संबंधित प्रभाग समितीकडून परवानगी प्रदान करण्यात येणार आहे. महावितरणनेही यात सहभागी व्हावे असे आवाहन डॉ. शर्मा यांनी केले.

हे सुद्धा वाचा

Ambernath Attack : अंबरनाथमध्ये किरकोळ कारणावरून तरुणावर चॉपरने हल्ला, घटना सीसीटीव्हीत कैद

Ulhasnagar Crime : भाचीच्या वाढदिवसाला आला अन् सहा घरफोड्या केल्या! ‘पाहुण्या’ घरफोड्याला थेट कोठडीचा पाहुणचार

Kalyan Cheating : 4 कोटींचे कर्ज मिळवून देतो सांगत 40 लाखांचा गंडा, सांगलीतून दोन आरोपींना अटक

ठाणे महानगरपालिकेच्या www.thanecity.gov.in या संकेतस्थळावर ई-सुविधा सदर सुविधा tmc.infosoftech.co.in/ Mandaponline.html या लिंकवर उपलब्ध आहे. तसेच ऑनलाईन सुविधेमध्ये मंडप परवानगीसाठी पोलीस विभाग, वाहतूक पोलीस विभाग व अग्निशमन विभाग यांचा ना हरकत दाखला ऑनलाईन पध्दतीने api.infosoftech.co.in/#/login या लिंकवर ऑटो जनरेट पध्दतीने सादर करण्याची सुविधा उपलब्ध आहे.

महापालिकेचे नियम पाळणे बंधनकारक

महापालिकेने दिलेली परवानगी मंडपाच्‍या दर्शनी भागावर मंडळांनी लावणे बंधनकारक राहील. अन्यथा परवानगी नाही असे गृहित धरुन महानगरपालिकेकडून कारवाई करण्यात येईल असे महापालिकेच्या वतीने स्पष्ट करण्यात आले आहे.

दरम्यान उत्सव किंवा कार्यक्रमास, मंडप, स्टेज व कमानी उभारण्‍याकरीता महापालिकेने सविस्तर कार्यपध्‍दती निश्चित केली असून ती महापालिकेच्या संकेतस्थळावर उपलब्ध आहे. उच्च न्यायालय, मुंबई येथे दाखल जनहित याचिका क्र.173/2010 मध्ये उच्च न्यायालयाने दिलेल्या आदेशांचे काटेकोरपणे पालन सर्व उत्सव मंडळांनी करणे बंधनकारक असणार आहे. (One window facility of Municipal Corporation for permission of Public Ganeshotsav)