भाजपसोबत जाण्यासाठी आमची कधीच सहमती नव्हती – पहाटेच्या शपथविधीच्या अजितदादांच्या वक्तव्यावर शरद पवार यांचं स्पष्टीकरण

भारतीय जनता पक्षामध्ये जाण्यासाठी आम्हा लोकांची कधीच संमती नव्हती आणि (यपुढेही) नसेल असे सांगत शरद पवार यांनी अजित पवार यांचा दावा फेटाळला. 2019 च्या पहाटेच्या शपथविधीच्यावेळी नेमकं काय-काय ठरलं होतं याबाबत अजित पवार यांनी नुकताच मोठा गौप्यस्फोट केला. काल इंदापुरमध्ये अजित पवार यांनी मोठा खुलासा केला. पाच ते सहा वेळा आमची त्यावेळी भाजपासोबत जाण्याची चर्चा झाली. कुणाला मंत्रीपद द्यायचं हे ठरलं. पण मुंबईत आल्यानंतर वरिष्ठांनी निर्णय बदलला, असा गौप्यस्फोट अजित पवार यांनी काल केला होता.

भाजपसोबत जाण्यासाठी कधीच सहमती नव्हती आणि  नसेल

शरद पवार आज अहमदनगर दौऱ्यावर आहेत. त्यावेळी त्यांनी माध्यमांशी संवाद साधला. अजित पवार यांनी काल पहाटेच्या शपथविधी संदर्भात केलेल्या दाव्यावरून शरद पवार यांना आज प्रश्न विचारण्यात आला. मात्र त्यांनी तो दावा फेटाळून लावला. भाजपसाोबत जाण्यासाठी आमची कधीच सहमती नव्हती आणि (यापुढेही) राहणार नाही, असे शरद पवार यांनी स्पष्ट केले.

काय म्हणाले होते अजित पवार ?

“2004, 2009, 2014 आणि 2019 मी हर्षवर्धन पाटलांशी चर्चा करत नव्हतो. ते आमच्या वरिष्ठांशी चर्चा करते होते”, असं म्हणत अजित पवारांनी हर्षवर्धन पाटील आणि शरद पवारांना टोला लगावला. “देशातील एक नंबरच्या उद्योगपतीच्या घरी केंद्रीय गृहमंत्री अमित शाह, माजी केंद्रीय मंत्री शरद पवार, मी, खासदार प्रफुल्ल पटेल आम्ही एकत्र बसायचो. पाच ते सहा वेळा आमची त्यावेळी भाजपासोबत जाण्याची चर्चा झाली. कुणाला मंत्रीपद द्यायचं हे ठरलं. पण मुंबईत आल्यानंतर वरिष्ठांनी निर्णय बदलला. अमित शाहांचा मला फोन आला. तुम्ही शब्द दिला तो तुम्हाला पाळावा लागेल. त्यावेळी मी शब्दाचा पक्का होतो. मी शपथ घेतली. ते म्हणाले, तुम्हाला शब्द पाळावा लागेल. दुसऱ्या दिवशी 8 वाजता शपथ घेण्याचं ठरलं. मी शपथ घेतली. नंतर ते सरकार टीकू शकलं नाही”, असा गौप्यस्फोट अजित पवारांनी केला.