त्या फुटीर खासदारांना पंतप्रधानांनी दिला मोठा धीर; पार्थ पवारांना मराठीत काय विचारलं? आतली बातमी समोर

ठाकरे गटाचे सहाही फुटीर खासदार आणि ममता बॅनर्जी यांच्या फुटीर खासदारांनी आज पंतप्रधान नरेंद्र मोदी यांची भेट घेतली. यावेळी पंतप्रधान नरेंद्र मोदी यांनी या सर्व खासदारांना धीर दिला. तुम्ही चिंता करू नका. मी तुमच्यासोबत आहे. एनडीए हे एक कुटुंब आहे, अशा शब्दात पंतप्रधान नरेंद्र मोदी यांनी या खासदारांना धीर दिला. तसेच त्यांना संसदेत होणाऱ्या चर्चांमध्ये भाग घेण्याचा सल्लाही दिला. काही दिवसांपूर्वी पंतप्रधानांनी राज्यसभेवर निवडून आलेल्या एनडीएच्या खासदारांशीही संवाद साधून त्यांना मार्गदर्शन केलं होतं.

पंतप्रधान नरेंद्र मोदी यांनी एनडीएतील घटक पक्षांच्या सुमारे 45 खासदारांशी नाश्त्यावर संवाद साधत संसदेचे कामकाज सुरळीत चालण्यावर भर दिला. बैठकीत शिवसेना, राष्ट्रवादी काँग्रेस, राष्ट्रवादी काँग्रेस (अजित पवार गट), उपेंद्र कुशवाहा यांच्या पक्षासह विविध एनडीए घटक पक्षांचे खासदार उपस्थित होते. तसेच एनडीए हे एक कुटुंब असल्याचं त्यांना सांगितलं. आम्ही मित्र पक्षांच्या सोबत आहोत. तुम्ही संसदेतील चर्चांमध्ये भाग घ्या. संसदेचा इतिहास वाचा. संसदेला, संसदेच्या कामकाजाला समजून घ्या. संसदेच्या इतिहासाबाबतचं खूप मटेरियल आहे. चर्चेत भाग घेण्यासाठी या मटेरियलचा उपयोग करून घ्या, असं सांगतानाच आपल्या राज्याच्या विकासासाठी काम करा. राज्यांचा विकास झाला तर देशाचा विकास होईल, असं पंतप्रधानांनी त्यांना सांगितलं.

मी तुमच्यासोबत

तुम्हाला चिंता करण्याची गरज नाही. मी तुमच्यासोबत आहे, असं मोदी म्हणाले. उद्धव ठाकरे यांच्या पक्षातून शिंदे गटात आलेल्या खासदारांना मोदींनी धीर दिला. एनडीएमध्ये प्रत्येक व्यक्तीचा सन्मान केला जातो. सर्वांना संधी दिली जाते. आम्ही एनडीएच्या केवळ एखाद्या मित्र पक्षाच्या नाही तर प्रत्येक खासदारांच्या पाठी आहोत. तुम्हाला कुणाची चिंता करण्याची गरज नाहीये, असंही त्यांनी स्पष्ट केलं.

गोंधळावर चिंता

संसद ही लोकशाहीचे सर्वोच्च मंदिर असून तिचे कामकाज कोणत्याही अडथळ्याशिवाय सुरू राहणे आवश्यक असल्याचे त्यांनी सांगितले. सूत्रांच्या माहितीनुसार, संसदेत सुरू असलेल्या गोंधळाबाबत चिंता व्यक्त करताना पंतप्रधान म्हणाले की, वारंवार होणाऱ्या गदारोळामुळे नव्याने निवडून आलेल्या खासदारांना सभागृहात बोलण्याची संधी मिळत नाही, हा त्यांच्यावर अन्याय आहे. संसद सुरळीत चालावी यासाठी सरकारने विरोधकांशीही चर्चा केली असल्याचे त्यांनी नमूद केले. मात्र, गोंधळामुळे ना विरोधी पक्षांच्या सदस्यांना बोलण्याची संधी मिळत आहे, ना सत्ताधारी पक्षाच्या सदस्यांना, असंही त्यांनी सांगितलं.

वैयक्तिक विचारपूस

पंतप्रधानांनी खासदारांना आपल्या मतदारसंघातील विकासकामांना गती देण्याचे आवाहन केले. कोणत्याही विकासकामासाठी थेट पंतप्रधान कार्यालयाशी (PMO) संपर्क साधण्यास सांगितले. प्रत्येक खासदाराशी त्यांनी वैयक्तिक संवाद साधत त्यांची विचारपूस केली. धाराशिवचे खासदार ओमराजे निंबाळकर यांच्या योगाभ्यासाबाबतही त्यांनी विशेष चौकशी केली. आरोग्याची काळजी घेण्याचा सल्ला त्यांनी दिला.

पार्थ पवारांशी मराठीत संवाद

यावेळी मोदींनी बैठकीवेळी एनसीपी नेते पार्थ पवार यांच्याशी एकांतात चर्चा केली. यावेळी त्यांनी आई कशी आहे? त्यांची काळजी घ्या, अशी विचारणा मोदींनी केली. यावेळी मोदींनी पार्थ पवारांकडे उपमुख्यमंत्री सुनेत्रा पवार यांच्या प्रकृतीची मराठीत विचारपूस केली.