मुंबईतील पूर्व द्रुतगती मार्गावरील छेडा नगर ते विक्रोळी या भागात आणि विशेष करुन मार्गाच्या मध्यभागी असणाऱ्या दुभाजकावर पर्यावरणाच्या आणि सुशोभीकरणाच्या दृष्टीकोनातून विविध झाडे लावण्यात आली आहेत.
या झाडांमध्ये ‘बसंत रानी’या प्रकारच्या झाडांचाही समावेश आहे. सुमारे 25 ते 30 फूट उंच असणाऱ्या या झाडांना दरवर्षी साधारणपणे वसंत ऋतूत बहर येतो.
यावर्षी वसंत ऋतू सुरु होण्यापूर्वीच ही झाडे फुलांनी बहरली आहेत. फुलांनी डवरलेली ‘बसंत रानी’ची झाडे नागरिकांचे आणि पुष्पप्रेमींचे लक्ष वेधून घेत आहेत.
गेल्या वर्षी झालेल्या वृक्षगणनेनुसार महापालिका क्षेत्रात सुमारे 29 लाख 75 हजार 283 एवढे वृक्ष आहेत. यामध्येच 6 हजार 500 पेक्षा अधिक’बसंत रानी’ वृक्षांचाही समावेश आहे.
हिंदी भाषेत ‘बसंत रानी’ अशी ओळख असणाऱ्या या झाडाचे वनस्पतीय शास्त्रीय नाव ‘टॅब्यूबिया पेंटाफायला’ (Tabebuia Pentaphylla / Tabebuia Rosea) असे आहे. तर याच झाडाला इंग्रजीमध्ये ‘पिंक ट्रंम्पेट, पिंक पाऊल,पिंक टिकोमा’ या नावानेही ओळखले जाते.
