Photos : हरभऱ्याच्या पोत्यात 7 तोळे सोनं, घरी येताच शेतकरी सैरभैर, पुढे काय घडलं?
बुलढाणा येथील खामगाव कृषी उत्पन्न बाजार समितीने शेतकऱ्याचे हरवलेले अंदाजे ९ लाख रुपये किमतीचे ७ तोळे सोन्याचे दागिने तत्परतेने परत केले. हरभऱ्याच्या पोत्यांमध्ये चुकून राहिलेले हे दागिने शेतकरी जनार्दन तांदळे यांनी हरवल्याची तक्रार करताच, बाजार समितीच्या अधिकाऱ्यांनी शोध मोहीम राबवत ते सुरक्षित परत केले.
बुलढाणाच्या खामगाव कृषी उत्पन्न बाजार समितीने पुन्हा एकदा आपली विश्वासार्हता आणि शेतकऱ्यांप्रतीची निष्ठा सिद्ध केली आहे. एका शेतकऱ्याचे हरवलेले, अंदाजे ९ लाख रुपये किमतीचे ७ तोळे (सुमारे ७० ग्रॅम) सोन्याचे दागिने बाजार समितीच्या अधिकाऱ्यांनी तत्परता दाखवत त्याला परत केले आहेत. या अभूतपूर्व कामगिरीमुळे बाजार समितीचे सर्वत्र कौतुक होत आहे.
1 / 8
विदर्भातील सर्वात मोठी आणि एक श्रीमंत बाजार समिती म्हणून ओळखल्या जाणाऱ्या खामगाव कृषी उत्पन्न बाजार समितीमध्ये सध्या शेतमालाची मोठी आवक सुरु आहे. मेहकर तालुक्यातील कळसवीर येथील शेतकरी जनार्दन तांदळे हे आपला हरभरा विक्रीसाठी या बाजार समितीत घेऊन आले होते.
2 / 8
हरभऱ्याच्या पोत्यांमध्ये त्यांच्या कुटुंबियांनी ७ तोळे वजनाचे सोन्याचे विविध दागिने ठेवले होते. मात्र, हरभरा विक्रीसाठी घेऊन येणाऱ्या जनार्दन तांदळे यांना याची कोणतीही कल्पना नव्हती.
3 / 8
बाजार समितीतील अडत दुकानावर त्यांनी हरभऱ्याची विक्री केली. व्यवहार पूर्ण करून ते आपल्या गावी परतले. घरी पोहोचल्यानंतर त्यांच्या लक्षात आले की, सोन्याचे दागिने चुकून हरभऱ्याच्या पोत्यात ठेवून ते विक्रीसाठी आले आहेत.
4 / 8
एवढ्या मोठ्या किमतीचे दागिने हरवल्यामुळे तांदळे कुटुंबियांची मोठी घाबरगुंडी उडाली. परंतु, वेळ न गमावता शेतकरी जनार्दन तांदळे यांनी खामगाव कृषी उत्पन्न बाजार समितीच्या अधिकाऱ्यांशी संपर्क साधला.
5 / 8
यानंतर बाजार समितीचे अधिकारी आणि कर्मचाऱ्यांनी कोणताही विलंब न लावता तत्काळ शोध मोहीम सुरू केली. त्यांनी ज्या अडत दुकानावर हरभरा विकला गेला, तेथून पुढील प्रक्रिया तपासली. अथक प्रयत्नांनंतर हरभऱ्यातून ते दागिने सुरक्षितपणे शोधून काढले.
6 / 8
शोध पूर्ण झाल्यानंतर बाजार समितीच्या अधिकाऱ्यांनी प्रामाणिकपणे ते ७ तोळे सोन्याचे दागिने शेतकरी जनार्दन तांदळे यांच्याकडे सुपूर्द केले. यामुळे शेतकरी जनार्दन तांदळे यांनी बाजार समितीचे मनापासून आभार मानले. या घटनेतून खामगाव कृषी उत्पन्न बाजार समितीने शेतकऱ्यांप्रती असलेली आपली निष्ठा आणि प्रामाणिकपणा पुन्हा एकदा सिद्ध केला आहे.
7 / 8
या कृतीमुळे बाजार समितीने केवळ आपले कर्तव्यच बजावले नाही, तर हजारो शेतकऱ्यांचा विश्वास अधिक दृढ केला आहे. कृषी उत्पन्न बाजार समितीच्या या कौतुकास्पद कामगिरीमुळे सर्व स्तरांतून त्यांचे अभिनंदन केले जात आहे.
