Shiv Sena VBA Alliance | वंचित-शिवसेना युतीचा ‘या’ दिवसाचा मुहूर्त

मुंबई : राज्याच्या राजकारणातून या क्षणाची सर्वात मोठी बातमी समोर आली आहे. गेल्या अनेक दिवसांपासून शिवसेना (उद्धव ठाकरे गट) आणि वंचित बहुजन आघाडी यांच्यात युती होणार असल्याची एकच चर्चा होती. दोन्ही पक्षांची युती केव्हा होणार, असा प्रश्न सातत्याने उपस्थित केला जात होता. मात्र या प्रश्नाला आता कायमचा पूर्णविराम मिळाला आहे. अखेर शिवसेना-वंचितच्या युतीता मुहूर्त ठरला आहे.

प्रबोधनकार डॉट कॉमचा लोकार्पण सोहळ्यात उद्धव ठाकरे आणि प्रकाश आंबेडकर एकाच मंचावर एकत्र आले होते. उद्धव ठाकरे यांनी प्रकाश आंबेडकर यांच्यासोबत युतीचे संकेत दिले होते.

शिवसेना-वंचित यांच्यातील युतीसाठी 23 जानेवारीचा मुहूर्त ठरला आहे. शिवसेनाप्रमुख बाळासाहेब ठाकरे यांच्या जंयतीला दोन्ही पक्षांची युतीची घोषणा होणार आहे.

राज्यात काही महिन्यांपूर्वी राजकीय भूकंप घडला. शिवसेना फुटली. यानंतर दलित नेत्यांनी उद्धव ठाकरे यांना पाठिंबा दिला. काहींनी शिवसेनेत प्रवेश केला. तसेच सुषमा अंधारे यांच्या पक्षप्रवेशामुळे शिवसेनेला फायरब्रँड महिला नेता मिळाली.

पँथर भाई कांबळे हे भीमशक्ती-शिवशक्ती संघटनेचे संस्थापक अध्यक्ष आहेत. कांबळे यांच्यासह काही दिवसांपूर्वी संघटनेचे असंख्य पदाधिकाऱ्यांनी शिवसेनेत प्रवेश केला. त्यातच आता शिवसेना-वंचित युतीला ग्रीन सिग्नल मिळाला आहे. या युतीचा फायदा हा आगामी मुंबई महापालिका निवडणुकीत ठाकरे गट आणि वंचितला होईल, असंही म्हटलं जात आहे.

दरम्यान दलित मतं आपल्याकडे खेचण्यासाठी याआधीच मुख्यमंत्री एकनाथ शिंदे यांनी मोठी खेळी केली. काहीच दिवसांपूर्वी एकनाथ शिंदे गट आणि जोगेंद्र कवाडे यांच्या नेतृत्वातील पिपल्स रिपब्लिकन पार्टीची युती झाली.

शिव, शाहू, फुले. डॉ. बाबासाहेब आंबेडकर यांचा सम्यक परिवर्तनाचा विचार हा आमच्या आघाडीचा वैचारिक आधार आहे. महाराष्ट्राला विकासगामी करण्यासाठी आणि राज्यातील सर्व समाज समूहांच्या हक्कासाठी शिंदे आणि त्यांचा पक्ष कटिबद्ध आहे. थोर महामानवांच्या विचारावर आमची आघाडी वाटचाल करेल, असं कवाडे तेव्हा म्हणाले होते.