मीरा भाईंदर महापालिकेत शिवसेना नगरसेवकांचा राडा, स्थायी समितीच्या सभागृहाची तोडफोड

मीरा भाईंदर: मीरा-भाईंदर महापालिकेमध्ये शिवसेना आणि भाजप नगरसेवकांमधला (Mira Bhayandar Shivsena Ruckus) वाद चांगलाच उफाळून आला. शिवसेनाप्रमुख बाळासाहेब ठाकरे कलादालनावरुन झालेल्या वादानंतर शिवसेनेच्या नगरसेवकांनी स्थायी समितीच्या सभागृहाची तोडफोड केली.

मीरा-भाईंदर महापालिकेत स्थायी समितीच्या बैठकीत शिवसेनाप्रमुख बाळासाहेब ठाकरे यांच्या कलादालनाच्या विषयाचा समावेश न केल्याने शिवसेनेच्या नगरसेवकांनी आक्रमक पवित्रा (Mira Bhayandar Shivsena Ruckus) घेतला.

मीरा-भाईंदर महापालिकेत मंगळवारी स्थायी समितीची बैठक आयोजित करण्यात आली होती. आचारसंहिता लागू होण्यापूर्वीची ही शेवटची बैठक असल्याच्या शक्यतेमुळे बाळासाहेब ठाकरे यांच्या कलादालनाचा विषय पटलावर घेण्याची शिवसेना नगरसेवकांची मागणी होती. मात्र महापौरांनी दुर्लक्ष केल्यामुळे सेना नगरसेवकांचा संताप झाला.

शिवसेनाप्रमुख बाळासाहेब ठाकरे यांच्या कलादालनाचा विषय गेल्या तीन वर्षांपासून प्रतिक्षेत आहे. त्यामुळे शिवसेनेच्या नगरसेवकांच्या आक्रमक पवित्र्यानंतर महापौरांनी सभा तहकूब केली. त्यानंतर शिवसेना-भाजपच्या नगरसेवकांमध्ये शाब्दिक बाचाबाची झाली.

युतीत तणाव, पुण्यात सर्वच्या सर्व भाजपचे आमदार, मग शिवसेनेला जागा कशा मिळणार?

शिवसेनेच्या नगरसेवकांनी भाजपचे स्थानिक आमदार नरेंद्र मेहतांना शिवीगाळ केल्याचा आरोप आहे. महापौर कार्यालय आणि स्थायी समितीच्या सभागृहाचीही तोडफोड शिवसेना नगरसेवकांनी केल्याचं कॅमेरात कैद झालं आहे. राज्यात युती झाली तरी मीरा-भाईंदरमध्ये युती होणार नाही, अशा घोषणाही यावेळी शिवसेना नगरसेवकांनी दिल्याचं म्हटलं जातं.

मीरा भाईंदर महापालिकेमध्ये भाजपचे 61 तर शिवसेनेचे 22 नगरसेवक आहेत. मीरा भाईंदरमधील वादाच्या अंकावर कधी पडदा पडणार, आणि तो न पडल्यास विधानसभेवर काय परिणाम होणार, हे पाहणं महत्त्वाचं ठरणार आहे.