आयसीसीच्या अध्यक्षपदी निवड होताच Jay Shah यांची पहिली प्रतिक्रिया, म्हणाले….
Jay Shah 1st Reaction After Icc Chief: जय शाह आयसीसी अध्यक्षपदी नियुक्त होणारे पाचवे भारतीय ठरले. जय शाह यांनी त्यांची बिनविरोध निवड झाल्यानंतर काय म्हटलं? जाणून घ्या.
क्रिकेट विश्वातील सर्वोच्च संस्थेच्या अध्यक्षपदाची जबाबदारी एका भारतीयाला मिळाली आहे. बीसीसीआय सचिव आणि एसीसीचे अध्यक्ष जय शाह यांची आयसीसीच्या अध्यक्षपदी बिनविरोध निवड करण्यात आली आहे. जय शाह यांची बीसीसीआय सचिव म्हणून ही दुसरी वेळ आहे. तर शाह 2021 पासून एसीसीचं अध्यक्षपद सांभाळत आहेत. त्यानंतर आता त्यांना आयसीसीच्या अध्यक्षपदाची जबाबदारी मिळाली आहे. जय शाह 1 डिसेंबर 2024 रोजी अध्यक्षपदाचा पदभार स्वीकारणार आहेत. जय शाह हे यासह आयसीसीचे सर्वात युवा अध्यक्ष ठरले आहेत. जय शाह यांनी वयाच्या 35व्या वर्षी हा कारनामा केला आहे.
जय शाह यांची प्रतिक्रिया
ग्रेग बार्कले यांची आयसीसी अध्यक्ष म्हणून दुसरी वेळ आहे. त्यांनी तिसऱ्या वेळ अध्यक्षपदी राहण्यास नकार दिला. त्यामुळे आयसीसी अध्यक्षपदासाठी अर्ज मागवण्यात आले. जय शाह यांच्याव्यतिरिक्त कुणीच शेवटच्या तारखेपर्यंत अर्ज केला नाहबीत.त्यामुळे जय शाह हे बिनविरोध निवडून आले. आयसीसी अध्यक्ष म्हणून घोषणा होताच जय शाह आनंद व्यक्त केला. क्रिकेटची जागतिक स्तरावर लोकप्रियता वाढवण्याबाबत शाह म्हणाले. तसेच आयसीसी सदस्य राष्ट्रांसह क्रिकेटचा आणखी प्रचार आणि प्रसार करण्यासाठी कटीबद्ध असल्याचं शाह यांनी म्हटलं.
क्रिकेटमधील तिन्ही फॉर्मेटचं अस्तित्व जपण्यासाठी, आधुनिक तंत्रज्ञानाला प्रोत्साहन देणं आणि अनेक योजनांचं क्रिकेट वर्तुळात आयोजन करणं महत्त्वपूर्ण असल्याचं जय शाह म्हणाले. क्रिकेटला लोकप्रिय करणं हे माझं आधीपासून लक्ष्य असल्याचं जय शाह यांनी नमूद केलं. जय शाह सलग 2 वेळा अध्यक्षपदी कायम राहू शकतात. त्यानंतर ते 2028 साली बीसीसीआयच्या अध्यक्षपदाची जबाबदारी सांभाळू शकतात. नियमांनुसार कुणीही बीसीसीआय अध्यक्षपदी 6 वर्षच राहू शकतो. त्यानंतर संबंधित व्यक्तीला 3 वर्ष दूर रहावं लागतं.
जय शाह आयसीसी अध्यक्ष होणारे पाचवे भारतीय
Jay Shah has been elected unopposed as the next Independent Chair of the ICC.https://t.co/Len6DO9xlE
— ICC (@ICC) August 27, 2024
दरम्यान जय शाह यांना आयसीसीच्या अध्यक्षपदी नियुक्ती झाल्याने बीसीसीआय सचिव पदाचा राजीनामा द्यावा लागणार आहे. शाह हे गेल्या 5 वर्षांपासून या पदावर आहेत. शाह हे सध्या आयसीसीच्या अर्थ-व्यवसायविषयक उपसमितीचे प्रमुख आहेत. जय शाह यांची आयसीसीच्या या पदावर 2022 साली नियुक्ती करण्यात आली होती.
