भारताचा एक मोठा खेळाडू काऊंटी चॅम्पियनशिप खेळणार, ग्लॅमॉर्गन सोबत बोलणी सुरु
आधीच चेतेश्वर पुजारा ससेक्स, वॉशिंग्टन सुंदर लँकेशायर, क्रृणाल पंड्या, मोहम्मद सिराज दोघे (वॉरविकशायर), उमेश यादव (मिडलसेक्स) आणि नवदीप सैनी (केंट) संघाकडून काऊंटी क्रिकेट खेळत आहेत.
मुंबई: भारताचा आणखी एक मोठा खेळाडू काऊंटी क्रिकेट खेळायला जाणार आहे. त्याची इंग्लंड मधल्या काऊंटी क्लबसोबत बोलणी सुरु आहेत. आधीच भारताचे काही क्रिकेटपटू इंग्लंड मध्ये काऊंटी क्रिकेट खेळत आहेत. टीम इंडियाचा टॉप ऑर्डरचा फलंदाज शुभमन गिल (Shubhaman Gill) काऊंटी चॅम्पियनशिप (County Championship) मध्ये खेळताना दिसणार आहे. ग्लॅमॉर्गन (Glamorgan) संघासोबत त्याची बोलणी सुरु आहेत. सर्वकाही व्यवस्थित जुळून आलं, तर यंदाच्या सीजन मध्ये काऊंटी क्रिकेट खेळणारा शुभमन गिल सातवा भारतीय क्रिकेटपटू ठरेल. चेतेश्वर पुजारा ससेक्स, वॉशिंग्टन सुंदर लँकेशायर, क्रृणाल पंड्या, मोहम्मद सिराज दोघे (वॉरविकशायर), उमेश यादव (मिडलसेक्स) आणि नवदीप सैनी (केंट) संघाकडून काऊंटी क्रिकेट खेळत आहेत. माजी क्रिकेटपटू आणि कोच रवी शास्त्री यांच्यानंतर ग्लॅमॉर्गन संघाकडून काऊंटी चॅम्पियनशिप खेळणारा शुभमन गिल तिसरा भारतीय क्रिकेटपटू आहे. 1987 ते 1991 दरम्यान रवी शास्त्री ग्लॅमॉर्गन संघाकडून काऊंटी क्रिकेट खेळले. सौरव गांगुली 2005 साली या संघाकडून खेळला. शुभमन गिल सध्या जबरदस्त फॉर्म मध्ये आहे. वेस्ट इंडिज आणि नुकत्यात संपलेल्या झिम्बाब्वे विरुद्धच्या वनडे सीरीज मध्ये शुभमन गिलने आपल्या फलंदाजीची क्षमता दाखवून दिली. त्याने खोऱ्याने धावा केल्या.
गिलने किती धावा केल्या?
वेस्ट इंडिज विरुद्धच्या मालिकेत गिलने 102.50 च्या सरासरीने 205 धावा आणि झिम्बाब्वे विरुद्ध 122.50 च्या सरासरीने 245 धावा केल्या आहेत. नुकत्याच संपलेल्या झिम्बाब्वे विरुद्धच्या मालिकेत त्याने मालिकावीराचा पुरस्कार मिळवला. आयपीएल पासून शुभमन गिल दमदार फलंदाजी करतोय.
किती कसोटी सामने खेळलाय?
शुभमन गिल आतापर्यंत 11 कसोटी सामने खेळलाय. त्यात त्याने 579 धावा केल्या आहेत. जुलै महिन्यात इंग्लंड विरुद्ध बर्मिंघम मध्ये तो शेवटचा कसोटी सामना खेळला. त्याने दोन्ही डावात मिळून 17 आणि 4 धावा केल्या. भारताने हा सामना गमावला होता. घरच्या पंजाब संघाकडून तो 12 रणजी सामने खेळलाय. यात त्याने 65.33 च्या सरासरीने 1176 धावा केल्या आहेत. ग्लॅमॉर्गन डीविजन मध्ये तिसऱ्या स्थानावर आहे. 10 सामन्यात 5 विजय मिळवले आहेत. अजून त्यांचे चार सामने बाकी आहेत. कार्डीफ मध्ये 5 सप्टेंबरपासून वॉरसेस्टशायर विरुद्ध सीजनची सुरुवात करणार आहेत.