Apple चा भारतात डंका! फक्त ‘इतक्या’ दिवसात कमवला 50000 कोटींचा गल्ला

मुंबई : संपूर्ण जगभरात आयफोन प्रेमी मोठ्या प्रमाणात पाहायला मिळतील. आयफोन म्हणजे लोकांचा जीव की प्राण झाला आहे. लोक आयफोनला स्वतःच्या जिवापेक्षाही जास्त जपतात. तसंच आता आयफोन बनवणारी कंपनी अॅपल भारतात आपला ठसा उमटवताना दिसत आहे. ॲपल कंपनीच्या उत्पादनांची विक्री प्रचंड आहे.

आयफोन निर्माता Apple उद्या भारतात आपलं पहिलं रिटेल स्टोअर उघडणार आहे.  यावेळी कंपनीचे सीईओ टीम कुक स्वत: मुंबईत येणार आहेत. पण तुम्हाला माहिती आहे का की ॲपल कंपनीने भारतात विक्रमी विक्री केली आहे.  कंपनीचा महसूल जवळपास 50,000 कोटी रुपयांवर पोहोचला आहे. कंपनीने आर्थिक वर्षाच्या अखेरीस सुमारे 50,000 कोटी रुपयांच्या वस्तूंची विक्री केली आहे.

Apple ने भारतात मार्चमध्ये संपलेल्या आर्थिक वर्षाच्या अखेरीस $6 अब्ज (सुमारे 49,200 कोटी रुपये) एवढी विक्री केली आहे. यातून भारताची बाजारपेठ अॅपलसाठी किती महत्त्वाची बनली आहे हे दिसून येत आहे. त्यामुळे आता कंपनी मुंबई आणि दिल्लीतही आपले खास स्टोअर उघडणार आहे.

Apple च्या कमाईत 50% वाढ

ब्लूमबर्गच्या अहवालानुसार, भारतात अॅपलचा महसूल गेल्या वर्षीच्या तुलनेत सुमारे 50 टक्क्यांनी वाढला आहे. कंपनीचा महसूल मागील आर्थिक वर्ष 2021-22 मध्ये $4.1 अब्ज होता.  4 मे रोजी apple आपला तिमाही निकाल जाहीर करणार आहे.

अॅपलसाठी भारत देश महत्त्वाचा

भारताची बाजारपेठ अॅपलसाठी खूप महत्त्वाची आहे.  उच्च श्रेणीचे उत्पादन असल्यामुळे ॲपल कंपनी भारताच्या स्मार्टफोन बाजारपेठेत फारसा प्रवेश करू शकली नाही. तसेच कंपनीचा मार्केट शेअरही जास्त नाही. त्यामुळेच  आता कंपनी आपली विक्री वाढवण्यावर भर देत आहे.