एकदा चार्जिंग करा, 75 किमी पळवा, ही स्कुटी खरेदी करण्यासाठी 18 हजारांचं अनुदान

मुंबई : इंजिनिअरिंग क्षेत्रातील मोठी कंपनी Greaves Cotton ने हाय-स्पीड इलेक्ट्रिक स्कुटी Ampere Zeal लाँच केली. विशेष म्हणजे ही स्कुटी खरेदी करण्यासाठी 18 हजारांचं अनुदान मिळणार आहे. फेम-2 योजनेअंतर्गत या स्कुटीवर 18 हजार रुपयांचं अनुदान मिळणार असल्याचं कंपनीने स्पष्ट केलं. त्यामुळे ही स्कुटी भारतीयांसाठी एक परवडणारा पर्याय ठरु शकते. अनुदानानंतर या स्कुटीची किंमत 66 हजार रुपये असेल.

Ampere Zeal ची टॉप स्पीड 55 किलोमीटर प्रती तास आहे. एकदा फूल चार्ज केल्यानंतर ही इलेक्ट्रिक स्कुटी 75 किलोमीटरपर्यंत धावू शकते. या स्कुटीला फुल चार्ज करण्यासाठी साडे पाच तासांचा वेळ लागतो. या स्कुटीचे बॉडी ग्राफिक्स आणि एलईडी हेडलाईट्स याच्या लूकला आधिक आकर्षक बनवतात.

Ampere Zeal चे फीचर्स

Ampere Zeal इलेक्ट्रिक स्कुटीमध्ये ड्यूअल स्पीड मोड (इकॉनमी आणि पावर) देण्यात आले आहेत. यामध्ये पावरफूल एक्सलरेशन आहे. ही स्कुटी 14 सेकंदात 0 ते 50 किलोमीटर प्रती तासाचा वेग घेऊ शकते, असा दावा कंपनीने केला आहे. या स्कुटीमध्ये अॅण्टी थेफ्ट अलार्मही देण्यात आला आहे. ही स्कुटी पाच कलर ऑप्शनमध्ये उपलब्ध आहे.

Ampere Zeal या स्कुटीला Ampere Vehicle ने बनवलं आहे. ही Greaves Cotton ची सहाय्यक कंपनी आहे. या कंपनीच्या कमी स्पीड आणि कमी किमतीतील स्कुटीही उपलब्ध आहेत. Ampere Vehicle चे इलेक्ट्रिक व्हेहिकल्स हे तीन वर्षांच्या वॉरंटीसोबत येतात. या कंपनीचे देशात 300 पेक्षा अधिक Greaves रिटेल स्टोर्स आणि 5 हजारपेक्षा अधिक आऊटलेट आहेत.