मोबाईल नंबर गेले तरी टेन्शन नको! नंबर परत मिळवण्यासाठी ‘हे’ आहेत खात्रीशीर उपाय

आजच्या काळात मोबाईल हा केवळ संवादाचे साधन न राहता, आपल्या सामाजिक आणि व्यावसायिक आयुष्याचा अविभाज्य भाग बनला आहे. अशा वेळी मोबाईलमधील संपर्क क्रमांक (Contacts) हरवणं ही मोठी अडचण ठरते. नवीन फोन घेतल्यानंतर, मोबाइल रिसेट केल्यानंतर किंवा बिघाडामुळे संपर्क गायब झाले, तर अनेकांना मोठा धक्का बसतो. मात्र काळजी करण्याची गरज नाही. तंत्रज्ञानाच्या सहाय्याने हरवलेले नंबर सहजपणे पुन्हा मिळवता येऊ शकतात—तेही कोणत्याही तांत्रिक ज्ञानाशिवाय.

अँड्रॉइड वापरकर्त्यांसाठी

जर तुमच्याकडे अँड्रॉइड फोन असेल, तर सर्वप्रथम तपासा की तुमचे Google खाते तुमच्या फोनसोबत सिंक झाले आहे का. बहुतेक अँड्रॉइड वापरकर्ते त्यांच्या Google खात्याचा वापर करून फोन सेटअप करतात, त्यामुळे संपर्क आपोआप Google Contacts मध्ये सेव्ह होतात. यासाठी तुम्हाला ब्राउझरमध्ये contacts.google.com हे वेबसाईट उघडून तुमच्या Google खात्याने लॉगिन करावं लागेल. येथे जुने सर्व नंबर दिसतील. जर काही नंबर चुकून हटवले असतील, तर ‘Undo Changes’ या पर्यायाने मागील 10 मिनिटांपासून ते 30 दिवसांपर्यंतचे बॅकअप पुनर्संचयित करता येतात.

iPhone वापरकर्त्यांसाठी

iPhone वापरत असाल, तर Settings > Apple ID > iCloud या मार्गाने जाऊन ‘Contacts’ हे पर्याय चालू आहे की नाही ते तपासा. जर ते चालू नसेल, तर ते सुरू करा आणि नंबर आपोआप दिसायला लागतील. अन्यथा, iCloud.com या वेबसाइटवर लॉगिन करून ‘Account Settings’ मध्ये ‘Restore Contacts’ या पर्यायावर क्लिक करा. इथे दिलेल्या बॅकअपमधून हवा तो पर्याय निवडा. काही वेळातच तुमचे हरवलेले संपर्क पुन्हा फोनवर दिसू लागतील.

थर्ड पार्टी अ‍ॅप्स आणि इतर युक्त्या

जर तुमचे नंबर Google किंवा iCloud शी जोडले गेले नसतील, तर Truecaller, Super Backup यांसारख्या थर्ड पार्टी अ‍ॅप्स तुमच्या मदतीला येऊ शकतात. या अ‍ॅप्समध्ये जर बॅकअप फीचर सुरू केले असेल, तर लॉगिन करताच संपर्क परत मिळू शकतात. याशिवाय, तुमच्या SMS अ‍ॅपमध्ये मेसेज थ्रेड तपासून देखील काही नंबर सापडू शकतात. ते कॉपी करून तुम्ही पुन्हा सेव्ह करू शकता.

भविष्यकाळासाठी सल्ला

संपर्क हरवण्याची अडचण पुन्हा उद्भवू नये, यासाठी पुढील गोष्टी लक्षात ठेवा:

नेहमी Google किंवा iCloud वर संपर्कांचे बॅकअप घ्या

नवीन फोन घेताना किंवा रिसेट करताना Sync पर्याय सुरू आहे का हे तपासा

थर्ड पार्टी अ‍ॅप्स वापरताना केवळ विश्वासार्ह अ‍ॅप्सचाच वापर करा

SIM कार्डवरील संपर्कांची खात्री करा