बोलणं आणि हावभाव हुबेहूब, रोबोट न्यूज अँकरची जगभर चर्चा

शांघाय: यापुढे रोबोट जर टीव्हीवर बातम्या सांगताना दिसला तर आश्चर्य वाटून घेऊ नका.चीनने चक्क बातम्या सांगणारा रोबोट तयार केला आहे. तो अगदी हुबेहूब माणसासारखा दिसत असून बातम्याही तसाच सांगतो. अगदी हुबेहूब अँकरप्रमाणे त्याच्या चेहऱ्यावर हावभाव दिसतात. हे पाहिल्यावर हा रोबोट आहे का यावर विश्वाच बसणार नाही. चीनच्या झिनुआ वृत्तसंस्थेने हा रोबोट तयार केला असून, बुधवारी या रोबोटने टीव्हीवर पदार्पण केलं. इंग्लिश भाषेत बातम्या सांगणाऱ्या रोबोटचं नाव झँग झाओ आहे.

झिनुआ न्यूज एजन्सी आणि चीनमधील सर्च इंजिन सोगोऊ डॉट कॉम यांनी संयुक्तरित्या या रोबोट अँकरची निर्मिती केली आहे. झिनुआच्या या रोबोटबद्दल सध्या चांगल्या आणि वाईट अशा दोन्ही प्रतिक्रिया येत आहेत. माणसाप्रमाणे आवाज आणि हावभाव यामुळे हा रोबोट सर्वांचं लक्ष वेधून घेत आहे. हा जगातील पहिला कृत्रिम बुद्धिमत्तेचा अँकर आहे.

Xinhua AI anchor, launched on Wednesday, starts presenting news reports from Thursday. In this program, he takes you to have a look at what a Panama official and the Chinese businessman Jack Ma say about the ongoing #CIIE. pic.twitter.com/OZkRQtv1sQ

— China Xinhua News (@XHNews) November 8, 2018

रोबोट अँकरची वैशिष्ट्ये

या रोबोट अँकरची अनेक वैशिष्ट्ये आहेत. महत्त्वाचं वैशिष्ट्य म्हणजे हा अँकर 24 तास काम करु शकतो. त्यामुळे साहजिकच हा मनुष्यबळ, पैसा या सर्वांची बचत करणार आहे.

महत्त्वाचं म्हणजे हा व्हर्चुअल न्यूज अँकर ब्रेकिंग न्यूजही त्याच ताकदीने देऊ शकतो.

शिवाय कृत्रिम बुद्धिमत्ता वापरुन चेहरा आणि माणसाचा आवाज यामुळे तो हुबेहूब जिवंत माणूस वाटतो.

या व्हर्चुअल न्यूज अँकरच्या ओठांच्या हालचालींसाठी मशिन लर्निंग प्रोग्रामचा वापर करण्यात आला आहे. मात्र थोडं लक्षपूर्वक पाहिल्यास लिप मूव्हमेंट जरा नकली असल्याचं जाणवतं.

हा न्यूज अँकर इंग्रजी आणि मेंडेरिन भाषेत बातम्या वाचू शकतो. झिनुआ वृत्तसंथा इंटरनेट आणि मोबाईलवर उपलब्ध आहे आणि या दोन्ही भाषांत आहे. त्यामुळे हा अँकर टीव्ही वेब पेजसाठी काम करेल.

ब्रेकिंग बातम्यांवेळी या अँकरची मदत होईल, असं या वृत्तसंस्थेचं म्हणणं आहे.