Abhijeet Dipke | पोलिसांशी पंगा भोवला! अभिजीत दीपकेंचं पोलीस संरक्षण जाणार?; नेमकी काय आहे मागणी?

कॉकरोच जनता पार्टीचे (CJP) संस्थापक अभिजीत दीपके सध्या राजकीय वर्तुळात चर्चेचा विषय ठरत आहेत. दिल्लीतील जंतर-मंतरवरील आंदोलनानंतर दीपके छत्रपती संभाजीनगर येथील त्यांच्या घरी परतले असून, सीजेपीच्या आगामी रणनीतीसंदर्भात बैठका सुरू असल्याची माहिती आहे. त्यांना भेटण्यासाठी नेते, कार्यकर्ते तसेच सर्वसामान्य नागरिक त्यांच्या निवासस्थानी येत असल्याचेही पाहायला मिळत आहे.

दरम्यान, काही दिवसांपूर्वी अभिजीत दीपके आणि पोलिसांमध्ये झालेल्या शाब्दिक वादाचा व्हिडीओ समोर आला होता. आपल्याला भेटण्यासाठी येणाऱ्या नागरिकांना आणि कार्यकर्त्यांना पोलिसांकडून योग्य वागणूक दिली जात नसल्याचा आरोप करत दीपके यांनी संताप व्यक्त केला होता. यावेळी संबंधित पोलीस अधिकाऱ्याशी त्यांची शाब्दिक चकमक झाल्याचेही समोर आले होते.

आता याच प्रकरणाच्या पार्श्वभूमीवर अभिजीत दीपके यांना मोठा धक्का बसण्याची शक्यता व्यक्त केली जात आहे. मिळालेल्या माहितीनुसार, दीपके यांना देण्यात आलेले पोलीस संरक्षण तात्काळ काढून घेण्यात यावे, अशी मागणी महाराष्ट्र पोलीस बॉईज असोसिएशनने केली आहे. यासंदर्भात संघटनेने जिल्हाधिकाऱ्यांकडे मागणी केल्याचे सांगण्यात येत आहे.

पोलीस अधिकाऱ्याला अपमानास्पद वागणूक दिल्याचा आरोप अभिजीत दीपके यांच्यावर करण्यात आला असून, या प्रकरणात त्यांच्यावर कायदेशीर कारवाई करण्यात यावी, अशी मागणीही संघटनेकडून करण्यात आली आहे.

इतकंच नाही तर अभिजीत दीपके यांचं पोलीस संरक्षण तात्काळ काढण्यात आलं नाही, तर आंदोलन करण्यात येईल, असा इशाराही महाराष्ट्र पोलीस बॉईज असोसिएशनने दिल्याची माहिती आहे. त्यामुळे या प्रकरणाला आता नवं वळण मिळालं असून, दीपके यांच्या पोलीस संरक्षणावरून आगामी काळात वाद आणखी चिघळण्याची शक्यता आहे.

दरम्यान, पोलीस संरक्षण काढण्याच्या मागणीवर अभिजीत दीपके किंवा सीजेपीकडून अधिकृत प्रतिक्रिया समोर आलेली असल्यास त्यांची बाजूही या प्रकरणात महत्त्वाची ठरणार आहे.