Vidarbha Drought : शेती जळाली, उत्पन्न बंद…आता शाळेची फी तरी कशी भरायची?; दुष्काळग्रस्त विद्यार्थ्यांचा सरकारला आर्त सवाल

विदर्भात पडलेल्या भीषण दुष्काळामुळे शेतकरी कुटुंबांसमोरील अडचणी वाढल्या आहेत. याचा थेट परिणाम शेतकऱ्यांच्या मुलांच्या शिक्षणावर होत आहे. अकोला जिल्ह्यातील एका शाळेतील विद्यार्थ्यांनी आपल्या कुटुंबांना भेडसावणाऱ्या आर्थिक समस्या टीव्ही ९ मराठीसमोर मांडल्या. पाणी नसल्यामुळे पिके जळून गेली असून, सोयाबीनसारख्या पिकांचे मोठे नुकसान झाले आहे. यामुळे शेतीतून कोणतेही उत्पन्न मिळाले नसल्याने पालकांवर मोठे आर्थिक संकट आले आहे.

या गंभीर परिस्थितीमुळे शालेय शुल्क आणि परीक्षा शुल्क भरणे पालकांना अशक्य झाले आहे. अनेक विद्यार्थ्यांच्या वडिलांना त्यांच्या मुलींच्या शिक्षणाचा खर्च, तसेच मोठ्या बहिणीच्या लग्नाचा खर्च भागवण्याची चिंता सतावत आहे. काही मुलींना तर शाळेला जाण्यासाठी बसचे भाडे नसल्याने पायी चालत जावे लागत आहे. या विद्यार्थ्यांनी सरकारला विनंती केली आहे की, या दुष्काळी परिस्थितीत त्यांच्या शाळेचे आणि परीक्षेचे शुल्क माफ करावे, जेणेकरून त्यांचे शिक्षण थांबू नये. दुष्काळ जाहीर झाल्यास त्यांना व त्यांच्या कुटुंबीयांना मोठा दिलासा मिळेल, अशी आशा त्यांनी व्यक्त केली.