Anil Parab : मुख्यमंत्र्यांची अडचण काय? असे मंत्री मांडीला माडी लावून… योगेश कदमांच्या हकालट्टीची मागणी करत थेट फडणवीसांना सवाल
अनिल परब यांनी मंत्री योगेश कदम यांच्या तात्काळ मंत्रिमंडळातून हकालपट्टीची मागणी केली आहे. कदम यांनी पुणे पोलिसांचे मनोधैर्य खच्ची केल्याचा आणि गुन्हेगारांना शस्त्र परवाने देण्यास मदत केल्याचा आरोप परब यांनी केला. मुख्यमंत्र्यांनी कारवाई न केल्यास शिवसेना रस्त्यावर उतरण्याचा इशारा त्यांनी दिला आहे.
शिवसेना (उद्धव बाळासाहेब ठाकरे) नेते अनिल परब यांनी मंत्री योगेश कदम यांना मंत्रिमंडळातून तात्काळ बडतर्फ करण्याची मागणी केली आहे. अनिल परब यांच्या मते, कदम यांनी पुणे पोलिसांनी कर्तव्य बजावताना दिलेल्या आदेशांना रद्द करून पोलिसांचे मनोधैर्य खच्ची करण्याचे काम केले आहे. योगेश कदम यांनी गुन्हेगारांशी संबंध असलेल्या व्यक्तींना शस्त्र परवाने मिळण्यास मदत केल्याचा आरोपही अनिल परब यांनी केला.
अनिल परब यांनी महाराष्ट्र सरकारमधील काही मंत्र्यांवर टीका करत, असे मंत्री आईच्या नावाने डान्सबार चालवून आणि गुंडांना अधिकृत शस्त्र परवाने देऊन त्यांना मदत करत असल्याचा दावा केला. अनिल परब यांनी मुख्यमंत्री देवेंद्र फडणवीस यांच्या प्रतिमेवर चिखलफेक करणाऱ्या अशा मंत्र्यांना का वाचवले जात आहे, असा प्रश्न उपस्थित केला. मुख्यमंत्र्यांनी या प्रकरणात लक्ष घालून कारवाई न केल्यास शिवसेना रस्त्यावर उतरून आंदोलन करेल, असा इशाराही त्यांनी दिला. अनिल परब मुख्यमंत्र्यांची भेट घेऊन निवेदन देणार आहेत.
