मस्कऱ्या गणपतीच्या दर्शनासाठी आशिष शेलार मुधोजीराजेंच्या निवासस्थानी

सांस्कृतिक मंत्री आशिष शेलार यांनी नागपुरातील प्रसिद्ध मस्कऱ्या गणपतीचे दर्शन घेतले. यावेळी त्यांनी मस्कऱ्या गणपतीचा २३९ वर्षांचा गौरवशाली इतिहास असून, या गणेशोत्सवाला राज्य महोत्सव म्हणून घोषित करण्यात आले असल्याची माहिती दिली. तसेच, गणेशोत्सवाला जागतिक स्तरावर UNESCO च्या अमृत यादीमध्ये स्थान मिळवून देण्यासाठी सरकार प्रयत्नशील असल्याचेही सांगितले. विद्यार्थ्यांच्या प्रश्नांवर बोलताना शेलार यांनी महाज्योती शिष्यवृत्ती परीक्षेतील गोंधळ आणि MPSC आंदोलनावर भाष्य केले. विद्यार्थ्यांना न्याय मिळेल आणि त्यांच्या समस्या सोडवण्यासाठी सरकार कटिबद्ध असल्याचे त्यांनी आश्वासन दिले. MPSC च्या संदर्भात उच्च न्यायालयाच्या आदेशाचे पालन करत विद्यार्थ्यांच्या भविष्याला प्राधान्य देणार असल्याचे त्यांनी स्पष्ट केले.

राजकीय घडामोडींवर बोलताना, आशिष शेलार यांनी राहुल गांधींच्या अलीकडील आंदोलनांना स्टंटबाजी आणि अराजकता संबोधत तीव्र शब्दांत टीका केली. लोकशाही व्यवस्थेचा आदर करण्याऐवजी गोंधळ निर्माण करण्याचा हा प्रयत्न असल्याचे त्यांनी नमूद केले. पंतप्रधान नरेंद्र मोदी यांच्या २५ वर्षांच्या सार्वजनिक सेवेचे त्यांनी कौतुक केले, तर रोहित पवारांच्या टीकेला त्यांनी गैरसमज पसरवणारे विधान असे म्हटले.