CJPच्या आंदोलनातील मिम पोस्टर्सची चर्चा; ‘ग्यानू मस्ट गो’पासून ‘वोटचोर ग्यानू’पर्यंत भन्नाट पोस्टर्स होतायेत व्हायरल
मुंबईच्या शिवाजी पार्कमध्ये सीजेपीने ज्ञानेश कुमार यांच्या राजीनाम्याच्या मागणीसाठी जोरदार आंदोलन सुरू केले आहे. सेव्ह डेमोक्रसी आणि गद्दार ग्यानू मस्ट गो यांसारख्या घोषणा देत, विविध भागांतून आलेले तरुण आणि ज्येष्ठ नागरिक क्रिएटिव्ह पोस्टर्ससह यात सहभागी झाले आहेत. हे आंदोलन मतदारांच्या हक्काचे रक्षण आणि लोकशाही वाचवण्यासाठी असल्याचे आंदोलकांचे म्हणणे आहे.
मुंबईच्या ऐतिहासिक शिवाजी पार्क मैदानावर सीजेपी (Citizens for Justice and Peace) या संघटनेने ज्ञानेश कुमार यांच्या राजीनाम्याच्या मागणीसाठी जोरदार आंदोलन सुरू केले आहे. या जेलभरो आंदोलनात मोठ्या संख्येने नागरिक, विशेषतः तरुण वर्ग, सहभागी झाला आहे. आंदोलकांनी हातात विविध क्रिएटिव्ह पोस्टर्स घेऊन गद्दार ग्यानू मस्ट गो आणि सेव्ह डेमोक्रसी यांसारख्या घोषणा दिल्या.
आंदोलनादरम्यान, एका युवकाने महात्मा गांधींच्या वेशभूषेत हजेरी लावली, तर अनेकांनी पपेट कुमार आणि वोटचोर ग्यानू असे लिहिलेले फलक झळकावले. लोकशाही वाचवणे आणि मतदारांच्या हक्कांचे रक्षण करणे हे या आंदोलनाचे मुख्य उद्दिष्ट आहे, असे आंदोलकांनी सांगितले. अमरावती, अंबरनाथ आणि बिहारसारख्या विविध ठिकाणांहून नागरिक या आंदोलनात सहभागी झाले आहेत. लवकरच अभिजीत दिपके आंदोलकांशी संवाद साधणार आहेत. या आंदोलनामुळे ज्ञानेश कुमार यांच्या राजीनाम्याची मागणी अधिक तीव्र झाली आहे.
