दुबईत अडकलेल्या भारतीयांची घरवापसी! सांगितला अंगावर शहारे आणणारा अनुभव

इराण-इस्त्रायल युद्धामुळे दुबईमध्ये अडकलेल्या भारतीयांना विशेष विमानाने मायदेशी परत आणण्यात आले आहे. जवळपास एक हजार भारतीय प्रवासी या विमानाने मुंबईत दाखल झाले. हे सर्व प्रवासी दुबई विमानतळावर अडकले होते. आज पहाटे 3 वाजता हे विशेष विमान मुंबईत उतरले, ज्यामुळे अडकलेल्या प्रवाशांना मोठा दिलासा मिळाला.

युद्धजन्य परिस्थितीमुळे अनेक विमानांची उड्डाणे रद्द करण्यात आली होती किंवा त्यांना परत बोलावण्यात आले होते. यामुळे प्रवाशांना मोठ्या अडचणींचा सामना करावा लागला. एका प्रवाशाने सांगितले की, प्रार्थनेसाठी गेले असताना त्यांना भारतात जाणाऱ्या विमानांबद्दल माहिती मिळाली. त्यानंतर ते धावतपळत विमानतळावर पोहोचले. मायदेशी परतल्यानंतर प्रवाशांनी प्रचंड आनंद आणि समाधान व्यक्त केले. आपल्या देशात आल्यावर घरच्यांसारखे वाटत असल्याचेही त्यांनी सांगितले. मुंबईसह चेन्नई आणि दिल्लीसाठीही विमानसेवा सुरू झाल्याने इतर भारतीयांनाही दिलासा मिळाला आहे.