CM Devendra Fadnavis | एकाच्या ताटातलं काढून दुसऱ्याच्या ताटात टाकणारे आम्ही नाही! मराठा आरक्षणावर मुख्यमंत्री फडणवीसांचं वक्तव्य
मुख्यमंत्री देवेंद्र फडणवीस यांनी स्पष्ट केले आहे की, कोणाच्या ताटातलं काढून दुसऱ्याला देणार नाही, तर संविधानानुसारच मराठा समाजाला न्याय मिळेल. मराठा आरक्षणासंदर्भात सरकार गंभीर असून, चर्चेची दारं नेहमी खुली आहेत. मराठा समाजाला आतापर्यंत दिलेला लाभ प्रत्यक्ष स्वरूपात दिसला आहे, असेही त्यांनी नमूद केले.
मुख्यमंत्री देवेंद्र फडणवीस यांनी मराठा आरक्षणाच्या मुद्द्यावर महत्त्वपूर्ण विधान केले आहे. “एकाच्या ताटातलं काढून दुसऱ्याच्या ताटात टाकणारे आम्ही नाही,” असे स्पष्ट करत त्यांनी सरकारची भूमिका मांडली. मराठा समाजाला न्याय देण्याबाबत सरकार कटिबद्ध असल्याचे फडणवीस यांनी अधोरेखित केले.
ते म्हणाले की, आजपर्यंत मराठा समाजाला जे काही दिले आहे, ते आम्हीच दिले आहे. हे केवळ कागदावरचे निर्णय नसून, त्याचा प्रत्यक्ष फायदा मराठा समाजाला झालेला आहे. संविधानात जे काही नमूद आहे, ते निश्चितपणे मराठा समाजाला मिळेल याची ग्वाही त्यांनी दिली. कोणा एका समाजाला दुखावून दुसऱ्याला फायदा देण्याचा विचार सरकार करणार नाही, असे संकेत त्यांनी दिले.
मराठा समाज असो किंवा इतर कोणताही समाज असो, सगळ्यांना न्याय देण्याची सरकारची भूमिका आहे. मराठा समाजाला न्याय देणार आहोत आणि त्या संदर्भात चर्चा झालेली आहे. सर्व शक्य ते आम्ही करू आणि चर्चेची दारं कधीच बंद केलेली नाहीत, असे फडणवीस यांनी सांगितले. मनोज जरांगे पाटील यांच्या नेतृत्वाखालील मराठा आरक्षणाच्या आंदोलनाच्या पार्श्वभूमीवर हे विधान महत्त्वाचे मानले जात आहे.
