जळगाव ग्रामसभेत अजब प्रकार; धूर फवारणीसंदर्भात प्रश्न विचारताच… माजी सरपंचांचा लजिरवाणा कारभार

जळगाव जिल्ह्यातील पाचोरा तालुक्यातील जारगाव ग्रामसभेत एका धक्कादायक घटनेने लोकशाहीच्या मूलभूत मूल्यांवर प्रश्नचिन्ह निर्माण झाले आहे. ग्रामसभेत धूर फवारणीसंदर्भात प्रश्न विचारल्यामुळे संतप्त झालेल्या माजी सरपंचाने एका तरुणाला बेदम मारहाण केल्याची घटना समोर आली आहे. या घटनेचा व्हिडिओ सध्या समाज माध्यमांवर वेगाने व्हायरल होत आहे, ज्यामुळे राज्यभरातून संताप व्यक्त होत आहे.

मिळालेल्या माहितीनुसार, जारगाव ग्रामसभेत एका तरुणाने धूर फवारणीच्या मुद्द्यावर प्रश्न विचारला होता. हा प्रश्न ऐकून माजी सरपंचाला राग अनावर झाला आणि त्याने भर सभेत त्या तरुणाला लाथाबुक्क्यांनी मारहाण करण्यास सुरुवात केली. तब्बल पाच ते सहा वेळा लाथाबुक्क्यांनी मारहाण केल्याचे व्हिडिओमध्ये स्पष्ट दिसत आहे. या घटनेमुळे सामान्य नागरिकांना लोकशाही प्रक्रियेत प्रश्न विचारण्याचा अधिकार आहे का, असा सवाल उपस्थित होत आहे. या गंभीर प्रकारानंतर पाचोरा पोलीस ठाण्यात माजी सरपंचासह अन्य तिघांविरोधात तक्रार अर्ज दाखल करण्यात आला आहे. पोलीस या प्रकरणाचा अधिक तपास करत आहेत. लोकशाहीमध्ये नागरिकांना प्रश्न विचारण्याचा पूर्ण अधिकार असतो, मात्र या घटनेने या अधिकारालाच पायदळी तुडवल्याचे चित्र आहे.