मोठी बातमी! महिला आरक्षण विधेयकासाठी महायुती सरकार मैदानात; मे महिन्यात विशेष अधिवेशनाची शक्यता

महिला सक्षमीकरणाच्या दिशेने राज्य सरकारकडून महत्त्वाचे पाऊल उचलण्याची तयारी सुरू असल्याची माहिती समोर येत आहे. महिला आरक्षण विधेयकाला पाठिंबा देण्यासाठी महायुती सरकार एक दिवसीय विशेष अधिवेशन घेण्याच्या तयारीत असल्याचे सूत्रांकडून कळते. या प्रस्तावित अधिवेशनाद्वारे केवळ राज्यातीलच नव्हे, तर देशभरातील महिलांसाठी सकारात्मक संदेश देण्याचा सरकारचा प्रयत्न असल्याचे सांगितले जात आहे. महिला आरक्षणाच्या मुद्द्यावर ठोस भूमिका मांडण्यासाठी सर्वपक्षीय आमदारांना या विशेष अधिवेशनात सहभागी होण्याची संधी दिली जाणार आहे. सूत्रांच्या माहितीनुसार, हे एकदिवसीय विशेष अधिवेशन मे महिन्यात आयोजित केले जाणार आहे. मात्र, अधिवेशनाची नेमकी तारीख अद्याप जाहीर करण्यात आलेली नाही. लवकरच याबाबत अधिकृत घोषणा होण्याची शक्यता आहे. दरम्यान, महिला आरक्षणाच्या मुद्द्यावर राजकीय हालचालींना वेग आला असून, या अधिवेशनाकडे राज्यासह देशाचेही लक्ष लागले आहे.