‘ती’ भाजपची विकृती, आमची ती संस्कृती नव्हे; देवेंद्र फडणवीसांच्या आरोपांवर संजय राऊतांचा पलटवार

मुंबई : tv9 मराठीच्या ‘महाराष्ट्राचा महासंकल्प’ या कार्यक्रमात बोलताना उपमुख्यमंत्री देवेंद्र फडणवीस यांनी अनेक गौप्यस्फोट केलेत. अजित पवार यांच्यासोबतच्या पहाटेच्या शपथविधीवरही त्यांनी भाष्य केलंय. त्यांच्या या वक्तव्यांवर शिवसेना ठाकरेगटाचे नेते संजय राऊत यांनी टीका केली आहे. “देवेंद्र फडणवीस जे बोलले त्यात कोणताही गौप्यस्फोट नाही. ते जे बोलले तो साधा लवंगी फटाकाही नव्हता. देवेंद्र फडणवीस आजही पहाटेचा शपथविधी विसरलेले नाहीत. ते नाव जरी काढलं तरी फडणवीसांना दचकून जाग येते. देवेंद्र फडणवीस यांनी स्वत: वर उपचार करून घ्यावेत”, असं संजय राऊत म्हणालेत. सूडबुद्धीने राजकारण करणं ही भाजपची विकृती, आमची ती संस्कृती नव्हे, असंही संजय राऊत म्हणालेत.