Pankaja Munde | सुनेत्रा पवार पालकमंत्री… पण मीच पालक! पंकजा मुंडेंच्या विधानाने राजकारणात नव्या चर्चांना उधाण

बीड जिल्ह्याच्या विकासाबाबत भाजप नेत्या पंकजा मुंडे यांनी महत्त्वाचे वक्तव्य करत गेवराईच्या विकासासाठी आपण पालकत्व स्वीकारत असल्याची घोषणा केली आहे. बीडच्या पालकमंत्री सुनेत्रा पवार असल्या तरी संपर्कमंत्री म्हणून विकासकामांवर स्वतः लक्ष देणार असल्याचे त्यांनी स्पष्ट केले. मिळालेल्या माहितीनुसार, पंढरपूर येथे माध्यमांशी संवाद साधताना पंकजा मुंडे यांनी गेवराई मतदारसंघाच्या विकासाबाबत आपली भूमिका स्पष्ट केली. बीड जिल्ह्याच्या पालकमंत्री सुनेत्रा पवार आहेत, मात्र गेवराईच्या सर्वांगीण विकासासाठी आपण पालकत्व स्वीकारत असल्याचे त्यांनी जाहीर केले.

यावेळी पंकजा मुंडे यांनी सांगितले की, सुनेत्रा पवार यांच्यासोबत सुमारे २५ मिनिटांची बैठक झाली होती. या बैठकीत विकासकामांबाबत सकारात्मक चर्चा झाली असून, सामाजिक हिताच्या कामांसाठी पक्षीय राजकारण बाजूला ठेवून एकत्रितपणे काम करण्याची भूमिका त्यांनी मांडली. पंकजा मुंडे म्हणाल्या की, “मी सुनेत्रा पवार यांना स्पष्ट सांगितले की, सामाजिक उपयोगाची आणि जनहिताची कामे करताना पक्षीय भेद विसरून पुढे जाऊया. त्यांनीही या भूमिकेला सकारात्मक प्रतिसाद दिला आहे.”

दरम्यान, गेवराईच्या विकासासाठी संपर्कमंत्री म्हणून सक्रिय भूमिका बजावणार असल्याचे सांगत, विकासकामांमध्ये कोणतीही राजकीय अडचण येऊ न देता जनतेच्या हितासाठी काम करण्याचा निर्धार पंकजा मुंडे यांनी व्यक्त केला.

या वक्तव्यानंतर बीड जिल्ह्यातील राजकीय वर्तुळात नव्या चर्चांना सुरुवात झाली असून, विकासाच्या मुद्द्यावर महायुतीतील समन्वयाची नवी दिशा दिसणार का, याकडे आता सर्वांचे लक्ष लागले आहे.