महत्त्वाकांक्षेसाठी नाही, मिशनसाठी जगतो’; 25 वर्षांच्या सत्तेतील प्रवासावर मोदींचं मनोगत

पंतप्रधान नरेंद्र मोदी यांनी नुकत्याच एका सोहळ्यात आपल्या सार्वजनिक जीवनातील २५ वर्षांच्या सेवेचा आढावा घेतला. दिल्लीतील इंदिरा गांधी स्टेडियममध्ये आयोजित या कार्यक्रमात त्यांनी ‘सेवा हाच आपला धर्म आणि कर्म आहे’ असे नमूद केले. ‘देशाने मला खूप काही दिले आहे आणि माझ्या आजवरच्या यशात देशवासियांचा मोठा वाटा आहे,’ असे सांगत त्यांनी जनतेप्रती कृतज्ञता व्यक्त केली. जनतेच्या योगदानामुळेच आपण आज या पदावर आहोत, असेही ते म्हणाले.

मोदींनी २०४७ पर्यंत भारताला ‘विकसित भारत’ बनवण्याचा संकल्प पुन्हा एकदा जाहीर केला. त्यांनी ‘आत्मनिर्भर भारताच्या’ घोषणेला बळकटी दिली आणि ‘वी विल डू इट’ असा आत्मविश्वास व्यक्त केला. पंतप्रधान होईन असे कधी वाटले नव्हते, अशी नम्र कबुली देत त्यांनी भारताच्या लोकशाहीला आणि संविधानाला वंदन केले. ते आजही स्वतःला एक विद्यार्थी मानतात, जो देशात घडणाऱ्या प्रत्येक घटनेतून काहीतरी शिकतो. हितचिंतकांनी नेहमी प्रोत्साहित केले, तर टीकाकारांनी आत्मपरीक्षण करण्यास भाग पाडले. जनता आपल्यासाठी ईश्वराचे रूप असल्याचे सांगत, मोदींनी आपण महत्त्वाकांक्षेसाठी नव्हे, तर एका मिशनसाठी जगणारे व्यक्ती असल्याचे स्पष्ट केले.