भाजपमध्ये जाणाऱ्या काँग्रेस नेत्याला थेट राहुल गांधींचा फोन; नंतर… नेमकं काय घडलं?

चिखली विधानसभेचे माजी आमदार राहुल बोंद्रे यांनी अखेर काँग्रेसमध्येच राहण्याचा महत्त्वाचा निर्णय घेतला आहे. काही दिवसांपूर्वी ते भारतीय जनता पक्षामध्ये प्रवेश करण्याच्या विचारात होते, परंतु राहुल गांधी यांच्याशी झालेल्या दूरध्वनीवरील संभाषणाने त्यांचा निर्णय बदलला. राहुल बोंद्रे यांच्यावर खोटे गुन्हे दाखल करून, तसेच खोट्या चौकशीमध्ये अडकवून त्यांना सातत्याने त्रास दिला जात होता. या राजकीय दबावामुळे त्यांची मानसिकता भाजपमध्ये जाण्याची तयार झाली होती.  मात्र, ही माहिती राहुल गांधींपर्यंत पोहोचल्यानंतर त्यांनी तात्काळ राहुल बोंद्रे यांच्याशी संपर्क साधला. राहुल गांधींनी बोंद्रे यांना धीर देत, “घाबरू नका, दबावाखाली येऊ नका.

आम्ही तुमच्यासोबत आहोत. तुम्ही काँग्रेस पक्षाचे निष्ठावान कार्यकर्ते आहात, कोणतीही चूक करू नका,” असे आश्वासक शब्द दिले. राहुल गांधींच्या या शब्दांनी बोंद्रे भावूक झाले आणि त्यांनी पुन्हा एकदा काँग्रेससोबत राहण्याचा निर्धार व्यक्त केला. काँग्रेस पक्षाने आपल्याला सामाजिक आणि राजकीय वाटचालीत अनेक संधी दिल्या आणि जीवाभावाची माणसे दिली, याची त्यांना आठवण झाली. या निर्णयामुळे महाराष्ट्राच्या राजकारणात काँग्रेसला बळ मिळाल्याचे दिसत आहे.