Rahul Gandhi : निवडणूक आयोगाला भेटल्याशिवाय हटणार नाही…; राहुल गांधी-प्रियंका गांधींचा ठिय्या, पोलिसांनी घेतलं ताब्यात

दिल्लीत इंडिया आघाडीच्या खासदारांनी निवडणूक आयोगाच्या कार्यालयाबाहेर जोरदार आंदोलन केले. राहुल गांधी आणि प्रियंका गांधी यांच्या नेतृत्वाखालील या आंदोलनात मुख्य निवडणूक आयुक्त ज्ञानेश कुमार यांच्या राजीनाम्याची मागणी करण्यात आली. सकाळी संसद भवन ते आकाशवाणी भवनपर्यंत मोर्चा काढण्यात आला होता, जो पोलिसांनी अडवला. त्यानंतर खासदारांनी आकाशवाणी भवन परिसरात ठिय्या मांडला.

राहुल गांधींनी माध्यमांशी बोलताना भाजपवर लोकशाहीची हत्या करत असल्याचा आणि मतांची चोरी करत असल्याचा गंभीर आरोप केला. पोलिसांनी अनेक खासदारांना ताब्यात घेतले असले तरी, राहुल गांधी आणि प्रियंका गांधी हे निवडणूक आयोगाला भेटण्याची वेळ निश्चित होत नाही तोपर्यंत ठिय्या सोडणार नाही या भूमिकेवर ठाम होते. अखेरीस, पोलिसांना त्यांना ताब्यात घेण्यासाठी बसमध्ये बसवावे लागले. काँग्रेसकडून निवडणूक आयोगाला ३०० खासदारांना भेटण्याची वेळ मागितली असल्याचेही समोर आले आहे. या आंदोलनामुळे दिल्लीतील अनेक प्रमुख रस्ते बंद ठेवण्यात आले होते.