गणपती विसर्जनावेळी दोन गटांमध्ये तुफान राडा; वादानंतर दगडफेक… व्हिडीओ व्हयरल

जळगाव जिल्ह्यातील रावेर तालुक्यात गणपती विसर्जनावेळी एक गंभीर घटना घडली आहे. गणपती विसर्जनासाठी जात असताना दोन गटांमध्ये झालेल्या वादानंतर दगडफेकीचा प्रकार घडला. या घटनेमध्ये दोन ते तीन जण जखमी झाल्याचे वृत्त आहे. सध्या संपूर्ण परिसरात तणावपूर्ण शांतता असून, परिस्थिती नियंत्रणात ठेवण्यासाठी पोलिसांचा मोठा बंदोबस्त तैनात करण्यात आला आहे. मिळालेल्या माहितीनुसार, घरगुती गणपतींचे विसर्जन करण्यासाठी काही लहान मुले जात होती. त्याचवेळी, दुसऱ्या गटातील काही मुलांनी त्यांना एका विशिष्ट रस्त्याने जाण्यापासून रोखले. यावरून दोन्ही गटांमध्ये शाब्दिक वाद सुरू झाला, ज्याचे रूपांतर काही वेळातच दगडफेकीत झाले. या दगडफेकीत काही व्यक्तींना मार लागल्याने ते जखमी झाले.

घटनेची माहिती मिळताच रावेर पोलीस तात्काळ घटनास्थळी दाखल झाले आणि त्यांनी परिस्थिती नियंत्रणात आणली. रावेर पोलीस ठाण्यात या प्रकरणी गुन्हा दाखल करण्याची प्रक्रिया सुरू आहे. दगडफेक करणाऱ्या मुलांची ओळख पटवून त्यांना ताब्यात घेण्याची कारवाई देखील पोलिसांनी सुरू केली आहे. पोलिसांनी नागरिकांना अफवांवर विश्वास न ठेवण्याचे आवाहन केले आहे आणि परिसरात शांतता राखण्याचे आवाहन केले आहे. परिस्थितीवर पोलीस बारकाईने लक्ष ठेवून आहेत.