युद्धखोरांविरोधात उभं राहण्याची सत्ताधाऱ्यांची हिंमत नाही; राऊतांची खोचक टीका

संजय राऊत यांनी इराण आणि इस्रायल यांच्यातील युद्धजन्य परिस्थितीवर भाष्य करताना भारताच्या भूमिकेबद्दल गंभीर चिंता व्यक्त केली. रशियाकडून तेल खरेदी करण्याच्या मुद्द्यावरून त्यांनी अमेरिकेच्या प्रभावाखाली असल्याबद्दल टीका केली. चीन आणि रशिया इराणच्या बाजूने उभे दिसत असताना, अनेक राष्ट्रे युद्धखोरीच्या विरोधात भूमिका घेत असल्याचे राऊत यांनी नमूद केले. भारताने कायम शांतीचा संदेश दिला आहे. पंडित नेहरूंच्या पंचशील आणि तटस्थतेचा मार्ग स्वीकारण्याची गरज आहे, परंतु सध्याच्या नेतृत्वात युद्धखोर राष्ट्रांच्या विरोधात उभे राहण्याची हिंमत नाही, असा आरोप त्यांनी केला.

या युद्धाचे गंभीर परिणाम भारताच्या अर्थव्यवस्थेवर होत आहेत. देशाची निर्यात ठप्प झाली असून, शेतकऱ्यांचे मोठे नुकसान होत आहे. शेती उत्पादन, फळफळावळ आणि कपडा उद्योगावर निर्बंध आले आहेत. सरकारकडे यावर कोणतीही स्पष्ट भूमिका नाही, असे राऊत यांनी म्हटले. हजारो भारतीय नागरिक, ज्यात विद्यार्थी आणि पर्यटक यांचा समावेश आहे, परदेशात अडकले आहेत. त्यांच्या सुटकेबाबतही सरकारने कोणतीही स्पष्टता दर्शवलेली नाही, असे त्यांनी अधोरेखित केले.