राहुल गांधींकडे महत्त्वाची माहिती! संजय राऊतांचा मोठा खुलासा

खासदार संजय राऊत यांनी पत्रकार परिषदेत बोलताना केंद्र सरकारच्या आंतरराष्ट्रीय धोरणावर गंभीर प्रश्न उपस्थित केले. इराण-इस्रायल युद्धाच्या वाढत्या संघर्षाच्या पार्श्वभूमीवर भारताची भूमिका आणि पंतप्रधान नरेंद्र मोदी यांच्या मौनावर त्यांनी टीका केली. राहुल गांधींकडे भारताच्या आंतरराष्ट्रीय धोरणाबाबत अत्यंत महत्त्वाची माहिती असून, केंद्र सरकार त्यांच्या प्रश्नांना उत्तरे देण्यास तयार नसल्याचे राऊत म्हणाले.

राऊत यांनी परराष्ट्र मंत्री एस. जयशंकर यांच्या शांततेच्या बाजूने असल्याच्या विधानावरही आक्षेप घेतला. त्यांनी याला षंढांची शांतता असे संबोधत, युद्धाच्या ज्वाला भारतापर्यंत पोहोचल्या असून, महागाई, इंधनाच्या किमती आणि रोजगारावर त्याचा परिणाम होत असल्याचे निदर्शनास आणले. सरकारने राष्ट्रीय सुरक्षेच्या मुद्द्यांवर संसदेत चर्चा घडवून आणण्याची मागणीही राऊत यांनी केली. देशांतर्गत प्रश्नांमध्ये एका संशयास्पद मृत्यू प्रकरणाच्या सीबीआय चौकशीच्या दिरंगाईवरही त्यांनी चिंता व्यक्त केली.