Sanjay Raut : मीनाक्षी शिंदे म्हणजे ठाण्याची लेडी डॉन…; राऊतांचा मीनाक्षी शिंदेंवर थेट निशाणा

प्रदीप पूर्णेकर यांच्या मृत्यू प्रकरणी शिवसेना (उद्धव बाळासाहेब ठाकरे) नेते संजय राऊत यांनी गंभीर आरोप केले आहेत. त्यांनी हा मृत्यू पूर्णपणे राजकीय हत्या असल्याचे म्हटले आहे. राऊत यांनी ठाण्यातील लेडी डॉन म्हणून ओळखल्या जाणाऱ्या मीनाक्षी शिंदे यांच्यावर थेट निशाणा साधला आहे. मीनाक्षी शिंदे यांनी पूर्णेकरांना धमक्या दिल्या होत्या, ज्यात घरात घुसून संपवण्याची भाषा वापरल्याचे राऊत म्हणाले. “माझ्या नादाला लागलात तर सीपीला सांगून सरळ करीन,” अशी धमकी शिंदे यांनी दिल्याचे राऊत यांनी समाज माध्यमांवरील क्लिपचा हवाला देत सांगितले.

राऊत यांनी ठाण्यातील पोलीस दलातील काही अधिकाऱ्यांच्या कार्यपद्धतीवरही प्रश्नचिन्ह उपस्थित केले. वर्षानुवर्षे एकाच ठिकाणी ठाण मांडून बसलेले अधिकारी कुणाचे तरी एजंट म्हणून काम करत असल्याचा आरोप त्यांनी केला. अशा अधिकाऱ्यांकडून प्रदीप पूर्णेकर यांच्या खुनाचा तपास योग्य दिशेने होईल याची खात्री देवेंद्र फडणवीस कशी देतील, असा सवाल राऊतांनी गृहखात्याला विचारला आहे. या गंभीर आरोपांमुळे ठाण्यातील राजकीय आणि पोलीस वर्तुळात खळबळ उडाली आहे.