Sanjay Raut : हे सगळे ढोंगी, देशाला मूर्ख बनवताय… भारत-पाक सामन्यावरून राऊतांचा हल्लाबोल केला एकच सवाल

पहलगाम हल्ल्याच्या पार्श्वभूमीवर भारत-पाकिस्तान क्रिकेट सामन्याला देशाचा विरोध असतानाही हा सामना खेळल्याने संजय राऊत यांनी तीव्र नाराजी व्यक्त केली. भारतीय कर्णधारांनी पाकिस्तान क्रिकेट बोर्डाचे अध्यक्ष मोहसीन नक्वी यांच्या हस्ते ट्रॉफी स्वीकारण्यास नकार दिला या कृतीला त्यांनी नौटंकी संबोधले. “मैदानावर तुम्ही एकत्र खेळता, पण नंतर ट्रॉफी स्वीकारण्यास नकार देता, हे देशाला मूर्ख बनवण्यासारखे आहे”, असे राऊत म्हणाले. पंधरा दिवसांपूर्वी याच भारतीय संघाने मोहसीन नक्वी यांच्यासोबत फोटो काढले होते आणि हस्तांदोलन केले होते, याची आठवण त्यांनी करून दिली. पंतप्रधान किंवा भाजपच्या लोकांकडून देशाला मूर्ख बनवण्याची प्रेरणा घेतली आहे का, असा सवालही त्यांनी विचारला. हा सामना खेळणे हे हुतात्म्यांच्या रक्ताचा अपमान असल्याचे त्यांनी म्हटले.