Sayaji Shinde : झाडांबाबत राजकारण नको, निवडून दिलं म्हणजे… सयाजी शिंदेंचा तपोवन आंदोलनाला पाठिंबा अन् सरकारला टोला
अभिनेते सयाजी शिंदे यांनी नाशिकमधील तपोवन आंदोलनाला पाठिंबा दर्शवला आहे. निवडून दिलं म्हणजे सरकारला सर्व अधिकार मिळत नाहीत, असे ते म्हणाले. झाडांच्या मुद्द्यावर राजकारण न करण्याचे आवाहन त्यांनी केले. सामान्य माणसाच्या भावनांचा आदर करत तातडीने तोडगा काढण्याची मागणी शिंदे यांनी केली आहे.
नाशिक शहरातील तपोवन येथील वृक्षतोडीविरोधातील आंदोलनाला अभिनेते सयाजी शिंदे यांनी पाठिंबा दिला आहे. “निवडून दिलं म्हणजे सरकारला सगळेच अधिकार मिळत नाहीत,” असे सयाजी शिंदे यांनी ठामपणे सांगितले. झाडांच्या मुद्द्यावर राजकारण करू नका असे आवाहनही त्यांनी केले. जागृत नाशिककरांनी तपोवन वाचवण्यासाठी घेतलेली भूमिका अतिशय रास्त असल्याचे शिंदे यांचे मत आहे.
या आंदोलनामुळे महाराष्ट्रातील वृक्षप्रेमी, कवी, कलाकार आणि सामान्य नागरिक झाडांच्या संरक्षणासाठी एकवटले आहेत. कुंभमेळा, धर्म आणि सणांबद्दल आदर असताना, झाडांबद्दल आदर असेल तर माणसांबद्दल का नसावा, असा सवाल त्यांनी उपस्थित केला. सरकार सर्वसामान्य माणसाचा आदर राखत या प्रश्नावर तोडगा काढेल अशी अपेक्षा शिंदे यांनी व्यक्त केली. झाडांच्या बाबतीत राजकारण करण्याचा प्रयत्न होत असल्याच्या प्रश्नावर त्यांनी कोणतीही राजकीय भाष्य करणे टाळले, मात्र भाजपच्या काही लोकांनीही या भूमिकेला पाठिंबा दिल्याचे नमूद केले.
