शिवसेनेकडून पदाधिकाऱ्यांना नव्या कोऱ्या बोलेरो गाड्या… नेमकं कारण काय?
नाशिकमध्ये शिवसेना पक्षवाढीसाठी आमदार सुहास कांदे यांनी एक नवा पॅटर्न सुरू केला आहे. तालुकाप्रमुखांना नव्या कोऱ्या बोलेरो गाड्या देण्यात येणार आहेत. या गाड्यांच्या साहाय्याने ग्रामीण भागात जाऊन कार्यकर्त्यांशी संवाद साधणे, जनतेच्या समस्या जाणून घेणे आणि संघटनेला तळागाळात मजबूत करणे, हा यामागील प्रमुख उद्देश आहे.
नाशिकमध्ये शिवसेना पक्षवाढीसाठी आमदार सुहास कांदे यांनी एक अभिनव उपक्रम हाती घेतला आहे. पक्षाची संघटना मजबूत करण्याच्या उद्देशाने त्यांनी नाशकातील प्रत्येक तालुकाप्रमुखाला नव्या कोऱ्या बोलेरो गाड्या देण्याची घोषणा केली आहे. या गाड्यांच्या माध्यमातून तालुकाप्रमुखांना ग्रामीण भागातील जनतेपर्यंत पोहोचणे, कार्यकर्त्यांशी संवाद साधणे आणि स्थानिक समस्या जाणून घेणे शक्य होणार आहे.
शिवसेनेचे ब्रँडिंग वाढवण्यासह पक्ष तळागाळात रुजवण्यासाठी या उपक्रमाची संकल्पना आहे. आमदार सुहास कांदे यांनी सांगितले की, संपर्कप्रमुखाची जबाबदारी मिळाल्यानंतर त्यांना पक्ष मजबूत करण्याची गरज जाणवली. या उपक्रमाला मुख्यमंत्री एकनाथ शिंदे आणि खासदार श्रीकांत शिंदे यांनीही पसंती दर्शवली आहे. एकूण १४ गाड्या तयार करण्यात आल्या असून, यावर शिवसेनाप्रमुख बाळासाहेब ठाकरे, एकनाथ शिंदे आणि श्रीकांत शिंदे यांचे फोटो लावण्यात आले आहेत. आगामी जिल्हा परिषद आणि लोकसभा निवडणुका लक्षात घेऊन पक्ष संघटना अधिक बळकट करणे हा यामागील मुख्य हेतू आहे.
