Sunetra Pawar Meeting : NCP : सुनेत्रा पवारांनी सर्व आमदारांची बैठक बोलावली, नेमकं कारण काय?

राष्ट्रवादी काँग्रेस पक्षाच्या सर्व आमदारांची उद्या (मंगळवारी) संध्याकाळी ७ वाजता देवगिरी या शासकीय निवासस्थानी बैठक होणार आहे. सुनेत्रा पवार यांनी ही बैठक बोलावली आहे. आज झालेल्या पक्षाच्या कोअर कमिटीच्या बैठकीनंतर लगेचच ही आमदारांची बैठक आयोजित करण्यात आली आहे, ज्याचे कारण सध्या चर्चेचा विषय ठरले आहे.

यापूर्वी अजित पवार असताना दर मंगळवारी कॅबिनेटच्या बैठकीनंतर संध्याकाळी देवगिरी येथे राष्ट्रवादी काँग्रेसच्या सर्व आमदारांची नियमित बैठक होत असे. परंतु गेल्या चार महिन्यांपासून या बैठकांमध्ये खंड पडला होता. आता पुन्हा या बैठकांचे सत्र सुरू होत आहे.

गेल्या चार महिन्यांपासून आमदारांची बैठक न झाल्यामुळे आमदारांचे अनेक प्रश्न आणि विषय प्रलंबित आहेत. उद्याच्या बैठकीत सुनेत्रा पवार हे सर्व प्रश्न ऐकून घेणार आहेत. तसेच, आजच्या कोअर कमिटीच्या बैठकीमध्ये झालेल्या महत्त्वाच्या चर्चा आणि निर्णयांची माहिती देखील आमदारांना दिली जाण्याची शक्यता आहे. या बैठकीमुळे पक्षांतर्गत संवाद साधला जाणार असून, आमदारांच्या समस्यांवर तोडगा काढण्याचा प्रयत्न केला जाईल.