निवृत्तीनंतरची चिंता दूर करणारी LIC ची ‘ही’ योजना! जाणून घ्या पात्रता, गुंतवणूक रक्कम आणि अर्ज प्रक्रिया
निवृत्तीनंतर आर्थिक चिंता नकोय? एकदाच गुंतवणूक करून आयुष्यभराची सोय हवीय? मग LIC ची 'न्यू जीवन शांती' योजना तुमच्यासाठीच आहे! ही योजना तुम्हाला दरवर्षी खात्रीशीर पेन्शन मिळवून देऊ शकते.
आपण सगळेच आपल्या कमाईतून थोडीफार बचत करून ती अशा ठिकाणी गुंतवण्याचा विचार करतो, जिथे आपले पैसे सुरक्षित राहतील आणि त्यावर चांगला परतावाही मिळेल. विशेषतः Retirement नंतरच्या आर्थिक गरजांची चिंता अनेकांना सतावते. अशावेळी, LIC नेहमीच एक विश्वासार्ह पर्याय म्हणून समोर येतं. LIC कडे प्रत्येक वयोगटासाठी आणि गरजेनुसार अनेक उत्तम योजना आहेत.
त्यापैकीच एक खास योजना म्हणजे ‘एलआयसी न्यू जीवन शांती योजना’. ही एक सिंगल प्रीमियम योजना आहे, म्हणजे यात तुम्हाला फक्त एकदाच ठराविक रक्कम गुंतवायची आहे. आणि या एका गुंतवणुकीतून तुम्हाला निवृत्तीनंतर आयुष्यभर नियमित पेन्शन मिळत राहते. योग्य प्लॅनिंग केल्यास तुम्ही दरवर्षी १ लाख रुपयांपर्यंत किंवा त्याहून अधिक पेन्शन मिळवू शकता!
प्रत्येकाला वाटतं की निवृत्तीनंतर आपलं जीवन आर्थिकदृष्ट्या सुरक्षित असावं. जर तुम्हीही असाच विचार करत असाल आणि चांगल्या योजनेच्या शोधात असाल, तर ‘न्यू जीवन शांती’ योजना तुमच्यासाठी खूप उपयुक्त ठरू शकते. ही योजना तुम्हाला एकदा गुंतवणूक केल्यावर आयुष्यभर नियमित पेन्शनची हमी देते. यात कोणताही Risk Cover नसला तरी, ही शुद्ध गुंतवणूक आणि पेन्शन योजना म्हणून लोकप्रिय आहे.
कोण घेऊ शकतं या योजनेचा लाभ ?
या योजनेत गुंतवणूक करण्यासाठी वयोमर्यादा ३० ते ७९ वर्षे इतकी आहे. तुम्ही तुमच्या सोयीनुसार दोन पर्यायांमधून निवड करू शकता: एक म्हणजे फक्त स्वतःसाठी पेन्शन (Single Life) आणि दुसरा म्हणजे स्वतःसाठी आणि जोडीदारासाठी संयुक्त पेन्शन (Joint Life).
पेन्शन कशी मिळेल?
‘न्यू जीवन शांती’ ही एक Annuity योजना आहे. तुम्ही पॉलिसी घेतानाच पेन्शन कधीपासून आणि किती हवी हे निश्चित करू शकता. उदाहरणार्थ, जर ५५ वर्षांची व्यक्ती ११ लाख रुपये एकदाच गुंतवते आणि पेन्शन ५ वर्षांनंतर सुरू करते, तर त्या व्यक्तीला दरवर्षी १ लाखापेक्षा जास्त पेन्शन मिळू शकते. पेन्शनची रक्कम तुमच्या वयावर, गुंतवणुकीवर आणि पेन्शन सुरू करण्याच्या वेळेवर अवलंबून असते.
योजनेची इतर वैशिष्ट्ये काय ?
या योजनेत तुम्ही किमान १.५ लाख रुपये गुंतवू शकता, तर कमाल गुंतवणुकीला मर्यादा नाही. तुम्ही ही पॉलिसी गरजेनुसार कधीही Surrender करू शकता. तसेच, दुर्दैवाने पॉलिसीधारकाचा मृत्यू झाल्यास, गुंतवलेली किंवा ठरलेली रक्कम त्याच्या नॉमिनीला मिळते. LIC ने अलीकडे या योजनेचे पेन्शन दरही वाढवले आहेत.
