महाराष्ट्रात सरकारी नोकरीची सुवर्णसंधी, पगार 2 लाखापर्यंत, कोणत्या पदांचा समावेश? जाणून घ्या शेवटची तारीख

सरकारी नोकरीच्या प्रतीक्षेत असलेल्या तरुणांसाठी महाराष्ट्र लोकसेवा आयोगाने (MPSC) मोठी घोषणा केली आहे. महाराष्ट्र लोकसेवा आयोगामार्फत २०२६ या वर्षासाठी विविध विभागांतील एकूण ५७१ रिक्त पदांच्या भरतीसाठी अधिकृत अधिसूचना प्रसिद्ध करण्यात आली आहे. या भरती प्रक्रियेद्वारे राज्यातील आरोग्य, गृह आणि प्रशासन विभागातील अत्यंत महत्त्वाच्या पदांवर पात्र उमेदवारांची नियुक्ती करण्यात येणार आहे. यासाठी इच्छुक आणि पात्र उमेदवारांना ९ एप्रिल २०२६ पर्यंत आपले अर्ज ऑनलाईन पद्धतीने सादर करणे अनिवार्य असणार आहे.

विविध पदांचा समावेश

महाराष्ट्र लोकसेवा आयोगाने काढलेल्या या भरती मोहिमेचे वैशिष्ट्य म्हणजे यामध्ये तांत्रिक आणि प्रशासकीय अशा दोन्ही प्रकारच्या पदांचा समावेश आहे. यात एकूण ५७१ रिक्त जागा आहेत. त्यात वैद्यकीय अधिकारी (Medical Officer), सार्वजनिक सरकारी वकील (Public Prosecutor), जिल्हा सैनिक कल्याण अधिकारी, मोटर वाहन सरकारी वकील, उपआरोग्य अधिकारी (Deputy Health Officer) आणि उपअधीक्षक (Deputy Superintendent) यांसारख्या श्रेणी-१ आणि श्रेणी-२ च्या पदांचा यात समावेश आहे. विविध शासकीय रुग्णालये आणि न्यायालयांमधील रिक्त जागा या भरतीमुळे भरल्या जाणार आहेत.

वयोमर्यादा आणि शैक्षणिक पात्रता

महाराष्ट्र लोकसेवा आयोगाने या पदांसाठी वयोमर्यादेचे निकष स्पष्ट केले आहेत. अर्ज करणाऱ्या उमेदवाराचे किमान वय १८ वर्षे असणे आवश्यक आहे, तर कमाल वयोमर्यादा ५० वर्षे निश्चित करण्यात आली आहे. शासन निर्णयानुसार, आरक्षित प्रवर्गातील उमेदवारांना (SC/ST/OBC/EWS) उच्च वयोमर्यादेत आवश्यक ती सवलत दिली जाणार आहे.

तसेच शैक्षणिक पात्रतेचा विचार केल्यास प्रत्येक पदासाठी स्वतंत्र निकष आहेत. वैद्यकीय क्षेत्रातील पदांसाठी एमबीबीएस (MBBS) पदवी आणि नोंदणी आवश्यक आहे. विधी (Law) संबंधित पदांसाठी उमेदवाराकडे एलएलबी (LLB) पदवी असणे गरजेचे आहे. इतर तांत्रिक किंवा प्रशासकीय पदांसाठी संबंधित विषयातील पदवी किंवा किमान कामाचा अनुभव असणे आवश्यक आहे. उमेदवारांनी अर्ज करण्यापूर्वी अधिकृत अधिसूचनेतील शैक्षणिक अटी वाचाव्यात असा सल्ला देण्यात आला आहे.

आकर्षक वेतनश्रेणी आणि अर्ज शुल्क

निवड झालेल्या उमेदवारांना सातव्या वेतन आयोगानुसार अतिशय आकर्षक पगार मिळणार आहे. पदाच्या स्वरूपानुसार दरमहा ४४,९०० रुपये ते २,११,९०० रुपये इतके वेतन निश्चित करण्यात आले आहे. या मूळ वेतनासोबतच महागाई भत्ता, घरभाडे भत्ता आणि इतर शासकीय सवलती देखील लागू राहतील.

अर्जासाठी शुल्क खालीलप्रमाणे

• अमागास (General): ३९४ रुपये
• मागासवर्गीय/आर्थिकदृष्ट्या दुर्बल/अनाथ (SC/ST/OBC/EWS): २९४ रुपये

अर्ज कसा कराल?

इच्छुक उमेदवारांनी आयोगाच्या अधिकृत संकेतस्थळावर— mpsc.gov.in वर जाऊन आपली नोंदणी पूर्ण करावी. अर्जाचा पूर्ण भरणा आणि परीक्षा शुल्काची प्रक्रिया ही केवळ ऑनलाईन पद्धतीनेच पूर्ण करता येईल. ९ एप्रिल ही अर्जाची अंतिम मुदत असल्याने, तांत्रिक अडचणी टाळण्यासाठी उमेदवारांनी वेळेत अर्ज करण्याचे आवाहन आयोगाकडून करण्यात आले आहे.