चुकीच्या औषधांमुळे दोन महिन्यांच्या बाळाचा मृत्यू?, डॉक्टरांचा बोलण्यास नकार, कुठे घडली धक्कादायक घटना?

उल्हासनगर : उल्हासनगरमध्ये एक धक्कादायक घटना उघडकीस आली आहे. एक महिला तिच्या दोन महिन्यांच्या बाळाला उल्हासनगर कॅम्प 5 मधील प्राथमिक आरोग्य केंद्रात डोस देण्यासाठी घेऊन गेली. डोस घेतल्यानंतर ताप आल्यास बाळाला पाजण्यासाठी गोळीही दिली. त्याप्रमाणे रात्री महिलेने बाळाला गोळीही पाजली. मात्र यानंतर बाळाची तब्येत बिघडली आणि बाळाचा दुर्दैवी मृत्यू झाला. डॉक्टरांनी चुकीचे इंजेक्शन दिल्याने बाळाचा मृत्यू झाल्याचा आरोप कुटुंबीयांनी केला आहे. डॉक्टरांनी मात्र प्रतिक्रिया देण्यास नकार दिला आहे.

प्राथमिक आरोग्य केंद्रात मुलाला इंजेक्शन दिले

उल्हासनगरच्या कॅम्प पाच भागात राहणारी एक महिला आपल्या दोन महिन्यांच्या मुलीला मंगळवारी दुपारी उल्हासनगरच्या कॅम्प 5 मधील प्राथमिक आरोग्य केंद्रात घेऊन गेली होती. यावेळी बाळाच्या दोन पायांवर दोन आणि हातावर एक असे 3 इंजेक्शन तिथल्या डॉक्टरांनी दिले. तसंच बाळाला ताप येऊ नये यासाठी एक गोळी सुद्धा रात्री झोपताना देण्यास सांगितली. त्यानुसार महिलेने बाळाला इंजेक्शन घेऊन घरी नेलं आणि रात्री झोपताना गोळीही बाळाला दिला.

मध्यरात्री मुलाची तब्येत बिघडली अन् मृत्यू

यानंतर मध्यरात्रीच्या सुमारास अचानक बाळाच्या नाकातून फेस आणि रक्त येऊ लागलं. यावेळी काजल यांच्यासह घरातील सर्वजण झोपले होते. पहाटे उठल्यानंतर ही बाब महिलेच्या लक्षात येताच त्यांनी बाळाला घेत मध्यवर्ती रुग्णालयात धाव घेतली. मात्र डॉक्टरांनी बाळाचा मृत्यू झाल्याचं सांगितलं. मंगळवारी दुपारी बाळाला इंजेक्शन दिल्यानंतर रात्रीपर्यंत बाळ सुखरूप होतं. मात्र रात्री गोळी दिल्यानंतरच बाळाचा मृत्यू झाल्यामुळे एक तर चुकीचं इंजेक्शन दिल्यामुळे किंवा जास्त पॉवरची गोळी दिल्यामुळे बाळाचा मृत्यू झाला असावा, असा आरोप महिला आणि त्यांच्या कुटुंबीयांनी केला आहे.

याप्रकरणी संबंधित डॉक्टरांवर कारवाई करण्याची मागणी सुद्धा त्यांनी केली असून, अन्य बालकांसोबत असा प्रकार होऊ नये, अशी अपेक्षा त्यांनी व्यक्त केली आहे. या संपूर्ण प्रकाराबाबत उल्हासनगरच्या शासकीय मध्यवर्ती रुग्णालयाचे मुख्य वैद्यकीय अधिकारी यांना विचारलं असता त्यांनी मात्र प्रतिक्रिया देण्यास नकार दिला आहे.