थिएटरमध्ये ‘बच्चन पांडे’चा शो सुरू असताना घातला राडा; The Kashmir Filesचा शो लावण्याची मागणी

विवेक अग्निहोत्री (Vivek Agnihotri) दिग्दर्शित 'द काश्मीर फाईल्स' (The Kashmir Files) हा चित्रपट प्रदर्शित होऊन 12 दिवस उलटले तरी बॉक्स ऑफिसवर अद्याप या चित्रपटाची जादू कायम आहे. नुकतंच या चित्रपटाने कमाईचा 200 कोटींचा टप्पा पार केला. बॉक्स ऑफिसवर प्रदर्शित होणाऱ्या मोठमोठ्या चित्रपटांना टक्कर देत द काश्मीर फाईल्सने थिएटरमध्ये अजूनही वर्चस्व गाजवत आहे.

Bachchan Pandey and The Kashmir FilesImage Credit source: Instagram

स्वाती वेमूल | Updated on: Mar 23, 2022 | 9:07 AM

विवेक अग्निहोत्री (Vivek Agnihotri) दिग्दर्शित ‘द काश्मीर फाईल्स’ (The Kashmir Files) हा चित्रपट प्रदर्शित होऊन 12 दिवस उलटले तरी बॉक्स ऑफिसवर अद्याप या चित्रपटाची जादू कायम आहे. नुकतंच या चित्रपटाने कमाईचा 200 कोटींचा टप्पा पार केला. बॉक्स ऑफिसवर प्रदर्शित होणाऱ्या मोठमोठ्या चित्रपटांना टक्कर देत द काश्मीर फाईल्सने थिएटरमध्ये अजूनही वर्चस्व गाजवत आहे. काही दिवसांपूर्वीच बॉलिवूडचा खिलाडी अर्थात अक्षय कुमारने या चित्रपटाचं आणि त्यातील अनुपम खेर यांच्या दमदार अभिनयाचं तोंडभरून कौतुक केलं. अक्षयचा ‘बच्चन पांडे’ (Bachchhan Paandey) हा चित्रपटसुद्धा थिएटरमध्ये दाखल झाला आहे. मात्र त्याच्या शोदरम्यान ओडिशामध्ये काही लोकांकडून थिएटरमध्ये राडा घालण्यात आला. ‘टाइम्स ऑफ इंडिया’ने यासंदर्भातील वृत्त दिलं आहे. ‘बच्चन पांडे’चा शो सुरू असताना भगवा स्कार्फ घातलेल्या काही लोकांनी थिएटरमध्ये प्रवेश केला आणि धमक्या देत शो मध्येच थांबवला.

‘बच्चन पांडे’चा शो थांबवत जमावाने ‘द काश्मीर फाईल्स’च्या शोची मागणी केली. याआधीही अशा प्रकारची घटना घडल्याची तक्रार संबंधित थिएटर मालकाने केली. कधी 10 तर कधी 100 लोकांचा जमाव थिएटरच्या परिसरात दाखल होतो आणि गोंधळ घातला जातो, असा आरोप त्यांनी केला आहे. अशाच एका जमावाने ‘द काश्मीर फाईल्स’चा शो सुरू असताना एक सीन काढून टाकल्याचा आरोप करत गोंधळ घातला होता. यावर बोलताना थिएटर मालक पुढे म्हणाला, “थिएटरचा मॅनेजर कोणत्याही चित्रपटातून एखादा सीन कसा काय काढू शकतो?”

द काश्मीर फाईल्सबद्दल अक्षय कुमारचं ट्विट-

Hearing absolutely incredible things about your performance in #TheKashmirFiles @AnupamPKher Amazing to see the audience back to the cinemas in large numbers. Hope to watch the film soon. Jai Ambe. https://t.co/tCKmqh5aJG

— Akshay Kumar (@akshaykumar) March 13, 2022

अक्षय कुमारच्या ‘बच्चन पांडे’ने आतापर्यंत 34 कोटी रुपयांची कमाई केली आहे. तर ‘द काश्मीर फाईल्स’ने भारतात गेल्या 11 दिवसांत 180 कोटी रुपयांचा गल्ला जमवला आहे. कोरोना महामारी आणि लॉकडाउननंतर प्रदर्शनाच्या दुसऱ्या आठवड्यात सर्वाधिक करणारा हा चित्रपट ठरला आहे. ‘अनुपम खेरजी, द काश्मीर फाईल्स या चित्रपटातील तुमच्या दमदार अभिनयाबद्दल मी ऐकलंय. प्रेक्षक मोठ्या संख्येने थिएटरमध्ये येत आहेत. मीसुद्धा हा चित्रपट लवकरच पाहीन,’ अशा शब्दांत अक्षयने कौतुक केलं होतं.