Casting Couch: ‘ती आपली वैयक्तिक निवड आहे, म्हणून…’, कास्टिंग काऊचबद्दल टीव्ही अभिनेत्रीचा मोठा खुलासा

मुंबई : कास्टिंग काऊच म्हणजे झगमगत्या विश्वातील काळं सत्य… चांगली ऑफर देण्याच्या बहाण्याने अनेक सेलिब्रिटींनी अभिनेत्रींसमोर कास्टिंग काऊच सारखी मागणी केली. आतापर्यंत अनेक अभिनेत्रींनी त्यांच्यावर आलेला कास्टिंग काऊचचा प्रसंग सांगितला आहे. ज्यामुळे अनेक अभिनेत्रींनी अभिनय क्षेत्रालाच राम-राम ठोकला. तर काही अभिनेत्रींनी मात्र मेहनत आणि जिद्दीवर झगमगत्या विश्वात स्वतःचं स्थान पक्क केलं आहे. आता देखील एका प्रसिद्ध अभिनेत्रीने तिच्यासोबत घडलेला धक्कादायक प्रसंग सांगितला आहे. ज्यामुळे सर्वत्र खळबळ माजली आहे. ‘जस्सी जैसी कोई नहीं’ फेम अभिनेत्री मोना सिंग हिने तिच्यासोबत घडलेल्या एका धक्कादायक घटनेवरून मौन सोडलं आहे.

मोना सिंग कास्टिंग काऊचबद्दल म्हणाली, ‘मी देखील कास्टिंग काऊचचा सामना केला आहे. ‘जस्सी जैसी कोई नहीं’ मालिका मिळण्याआधी मी ऑडिशनसाठी पुण्यातून मुंबईत यायची. तेव्हा अशा काही लोकांना भेटली, ज्यांना भेटून मला प्रचंड भीती वाटली. काय करु मला काहीही कळत नव्हतं..’

पुढे अभिनेत्री म्हणाली, ‘स्त्रिया कितीही भोळ्या असल्या, कोणत्याही वयाच्या असल्यातरी अशा प्रसंगी त्यांच्या मनात आलेली भीती कधीच चुकीची नसते. मी कधीही गैरसमज करत नाही. तेव्हा मी  खूप वाईट परिस्थितीत होती एवढंच मला माहिती होतं आणि मला तेथून पळ काढायचा होता…’ (mona singh on Casting Couch)

मोना सिंग हिच्या मते कास्टिंग काऊच सारखी गोष्ट फक्त बॉलिवूडमध्येच नाही तर, अन्य इंडस्ट्रीमध्ये आहे. अभिनेत्री म्हणाली, ‘आयुष्यात अशा गोष्टी घडत असतात. पण अशा गोष्टींमुळे मी स्वप्न पाहणं सोडलं नाही. मला इंडस्ट्रीमध्ये येण्यापासून कोणी थांबवलं नव्हतं. मी आजही माझ्या स्वप्नांच्या मागे धावत आहे. कास्टिंग काऊच सारखी गोष्ट अन्य क्षेत्रात देखील आहे. पण ती आता प्रत्येकाची वैयक्तिक निवड झाली आहे…’ असं देखील अभिनेत्री म्हणाली.

‘जस्सी जैसी कोई नहीं’ मालिकेच्या माध्यमातून प्रसिद्धी झोतात आलेल्या मोना सिंग हिला आज कोणत्याही ओळखीची गरज नाही. अभिनेत्रीने अनेक मालिकांमध्ये महत्त्वाची भूमिका साकारत चाहत्यांच्या मनावर राज्य केलं. एवढंच नाही तर ओटीटी प्लॅटफॉर्मवर देखील अभिनेत्रीचा बोलबाला आहे. मोनाने अनेक सिनेमांमध्ये देखील काम केलं आहे.

सोशल मीडियावर देखील अभिनेत्रीचे अनेक फोटो आणि व्हिडीओ व्हायरल होत असतात. तिच्या चाहत्यांची संख्या देखील फार मोठी आहे. चाहत्यांच्या संपर्कात राहण्यासाठी अभिनेत्री कायम स्वतःचे फोटो आणि व्हिडीओ सोशल मीडियावर पोस्ट करत असते.