निवेदिता सराफ यांची नवी मालिका; पहा ‘आई आणि बाबा रिटायर होत आहेत’चा प्रोमो
'आई आणि बाबा रिटायर होत आहेत' ही नवी मालिका लवकरच स्टार प्रवाह वाहिनीवर प्रेक्षकांच्या भेटीला येणार आहे. या मालिकेत निवेदिता सराफ आणि मंगेश जाधव यांच्या मुख्य भूमिका आहेत. या मालिकेचा प्रोमो सोशल मीडियावर पोस्ट करण्यात आला आहे.
स्टार प्रवाह वाहिनीवर ‘आई आणि बाबा रिटायर होत आहेत’ ही नवी मालिका प्रेक्षकांच्या भेटीला येणार आहे. या मालिकेचं शीर्षक ऐकताक्षणीच आपल्या डोळ्यासमोर आपले आई-बाबा नक्कीच उभे रहातात. प्रत्येकाच्या आयुष्यातली अत्यंत महत्त्वाची मात्र तितकीच गृहित धरली जाणारी ही दोन हक्काची माणसं. आयुष्यभर खस्ता खाऊन आईवडील आपल्या मुलांना लहानाचं मोठं करतात. मुलं शिकून स्वत:च्या पायावर उभी रहातात, त्यांच्या संसारात रमूनही जातात. आई-वडील मात्र घरच्या जबाबदारीतून कधीही रिटायर होत नाहीत. मुलं, त्यांचं शिक्षण, त्यांची नोकरी, त्यांचं लग्न आणि नंतर नातवंडं एकामागोमाग येणाऱ्या या जबाबदारीच्या चक्रात ते नकळतपणे अडकून जातात.
‘आई आणि बाबा रिटायर होत आहेत’ ही मालिकादेखील अशाच एका जोडप्याभोवती फिरते, ज्यांना खरंतर घरच्या जबाबदाऱ्यांमधून निवृत्त तर व्हायचं आहे. मात्र न संपणारं जबाबदारीचं ओझं त्यांच्यावर नकळतपणे लादलं जातं. दिग्गज कलावंत निवेदिता सराफ आणि मंगेश जाधव या नव्या मालिकेतून भेटीला येणार आहेत.
View this post on Instagram
या नव्या मालिकेविषयी सांगताना स्टार प्रवाहचे बिझनेस हेड सतीश राजवाडे म्हणाले, “आई आणि वडील हे आपले दैवत असतात आणि ही मालिका त्यांना आणि त्यांच्या निःस्वार्थपणाला अर्पण आहे. जे बोट धरून आपण चालतो, जी पावलं आपल्याला बळ देतात ती सुद्धा कधीतरी थकतील, त्यांना सुद्धा त्यांच्या जबाबदारीतून कधी तरी मुक्तता मिळायला हवी. त्यांना सुद्धा जाणीव करून देणं फार महत्वाचं असतं की आता आराम करा.”
“मुलं, सुना, जावई, नातवंडं अशी अनेक नाती उलगडत जाणारी गोष्ट आणि आई-वडील त्यांची भूमिका कशी शेवटपर्यंत ठामपणे आणि प्रामाणिकपणे बजावतात हे अधोरेखित करणारी ही मालिका आहे. ही मालिका सर्वांच्या घरात आणि मनात स्थान मिळवेल यात शंका नाही,” असा विश्वास त्यांनी व्यक्त केला. ‘आई आणि बाबा रिटायर होत आहेत’ ही मालिका लवकरच स्टार प्रवाह वाहिनीवर प्रेक्षकांच्या भेटीला येणार आहे.
