कोरोना नंतर ‘या’ आजाराने डोकेदुखी वाढवली, नाशिकमध्ये 22 जणांचा घेतला बळी…

नाशिक : कोरोना सारखीच लक्षणे असलेल्या स्वाइन फ्ल्यू (Swine flu) आजाराने पुन्हा एकदा डोक वर काढले आहे. नाशिकच्या (Nashik) आरोग्य विभागाची डोकेदुखी वाढली असून 22 जणांचा यामध्ये मृत्यू झाल्याची आकडेवारी समोर आली आहे. त्यामुळे कोरोना सारखीच लक्षणे असलेल्या आजाराकडे दुर्लक्ष करू नका, तातडीने शासकीय रुग्णालयात (Civil Hospital) उपचारासाठी दाखल व्हा असे आवाहन जिल्हा आरोग्य विभागाच्या वतीने करण्यात आले आहे. मृतांचा आकडा हा जास्त दिसत असल्याने आरोग्य विभागाने त्याचे वर्गीकरण करत शहर आणि ग्रामीणसह बाह्य असे विभाजन करत आकडेवारी सादर केली आहे. त्यात आत्तापर्यंत बाधितांचा आकडा 144 वर पोहचला आहे.

कोरोनाशी साधर्म्य असलेल्या स्वाइन फ्ल्यूने आरोग्य प्रशासानाची डोकेदुखी वाढवली स्वाइन फ्ल्यू थैमान घालणार नाही याची दक्षता घेण्याच्या हालचाली सुरू झाल्या आहे.

संततधार आणि सूर्याचे दर्शन होत नसल्याने साथीच्या आजारांचा प्रादुर्भाव वाढत असल्याने नाशिकमधील परिस्थिति बघता अधिकची चिंता वाढली आहे.

जून महिन्यात 2, जुलै महिन्यात 28, ऑगस्ट महिन्यात 102 तर सप्टेंबरमध्ये 12 असे आत्तापर्यंत शहरात 144 जण बाधित आढळून आले आहे.

नाशिक शहराबरोबरच बाह्य रुग्ण देखील नाशिकमध्ये दगावल्याची नोंद आहे. त्यात ग्रामीण भागातील रुग्णांचा देखील समावेश आहे.

जिल्ह्यात गेल्या आठवड्यापासून मुसळधार पाऊस होत आहे त्यातच सूर्यदर्शनही दुर्मिळ झाल्याने साथीच्या आजारांचा प्रादुर्भाव वाढत असल्याचा तर्क प्रशासनाकडून लावला जात आहे.

डेंगीबाधितांचाही आकडा वाढला –

संततधार पावसामुळे डेंगी आजारचे रुग्ण देखील मोठ्या प्रमाणात आढळून येतात. शहरात आत्तापर्यंत 230 रुग्ण आढळून आले आहेत. सप्टेंबर महिन्यात या आजाराचा प्रभाव जास्त दिसून येत आहे.